މަސްވެރިންގެ ދުވަހާއި ގުޅުވައިގެން އިނގުރައިދޫގެ އޮޑިވެރިންނަށް އަމާޒުކޮށްގެން ކަނޑު އުޅަނދުފަހަރުގެ ސަލާމަތާއި ރައްކާތެރިކަމާއި ގުޅޭގޮތުން މައުލޫމާތު ދިނުމަށް ސެމިނަރއެއް ބޭއްވުމަށް ނިންމައިފިއެވެ.
ރ. އިނގުރައިދޫ ކައުންސިލުން ވިދާޅުވީ މި ސެމިނަރ ބޭއްވުމަށް ހަމަޖެހިފައިވަނީ މޯލްޑިވްސް ޕޮލިސް ސަރވިސް އާއި ރ. އިނގުރައިދޫ ކައުންސިލާއި ގުޅިގެން ކަމަށެވެ. މި ސެމިނަރ ބޭއްވުމަށް ހަމަޖެހިފައިވަނީ މިމަހުގެ 10 ވަނަ ދުވަހުގެ ރޭ 8:30 ގައި އެރަށު ސްކޫލުގައެވެ.
މި ސެމިނަރގައި ކަނޑު އުޅަނދު ފަހަރުގެ ސަލާމަތާއި ރައްކާތެރިކަމާއި ގުޅޭގޮތުން މައުލޫމާތު ހިއްސާކުރެވޭނެ ކަމަށާއި، މި ބައްދަލުވުމުގައި ބައިވެރިވާން ބޭނުން ފަރާތްތަކަށް އެ ފުރުސަތު ހުޅުވާލެވިފައިވާ ކަމަށް އިނގުރައިދޫ ކައުންސިލުން ވިދާޅުވެއެވެ.
މަސްވެރިންގެ ދުވަހަކީ ޑިސެމްބަރުމަހުގެ 10 ވަނަ ދުވަހެވެ. މިދުވަސް މިއަހަރު ރަސްމީކޮށް ފާހަގަކުރުމަށް ހަމަޖެހިފައިވަނީ ކ. ގާފަރުގައެވެ. އެހެންނަމަވެސް ރާއްޖޭގެ އެކި ރަށްރަށުގައި ރަށު ފެންވަރުގައި މި ދުވަހާއި ގުޅުވައިގެން ރަށު ކައުންސިލްތަކުން ދަނީ ތަފާތު ހަރަކާތްތައް ބޭއްވުމަށް ރާވަމުންނެވެ.
