އޮޅުފަތި މިޔަރަކީ ރާއްޖޭގެ ކަނޑުތަކުގައްޔާއި ފަރުފަޅުތަކުގައި އެންމެ ގިނައިން އުޅޭ މިޔަރުގެ އެއްބާވަތެވެ.
ފަރުފަޅުތަކަށް މޫދަށްއެރި އުޅޭ މީހުންނަށް ގިނައިން ފެންނަ މެދު އިސްކޮޅެއްގެ މިޔަރެކެވެ. މިޔަރުގެ ތުން ކުރުވެފައި ކޮޅު ހުންނަނީ ވަރަށް ވަށްކޮށެވެ. މިމިޔަރުގެ ދަތްތައް ހުންނަނީ ކޮޅަށް ދޫކޮށް ކައިރިފަށް އޮމާންކޮށެވެ. މިޔަރު ގާތްގަޑަކަށް 2.1 މީޓަރަށް ބޮޑުވާކަމަށްވެއެވެ. ނަމަވެސް ގިނައިން ފެނިފައި ހުންނަނީ 1.6 މީޓަރަށް ވުރެކުދި ވަރަށް ތިލަ ހިސާބުތަކުގައި އުޅޭ މިޔަރެއް ކަމުގައިވިޔަސް ގާތްގަޑަކަށް 330 މީޓަރު އަޑީގައިވެސް މިބާވަތުގެ މިޔަރު އުޅެއެވެ. މިމިޔަރު ވިހާ ކޮންމެފަހަރަކު 1 އާއި 5 އާ ދެމެދުގެ ޢަދަދަކަށް ޅަމިޔަރު ވިހައެވެ. ވިހާ ޅަމިޔަރުގައި 52 ސެންޓިމީޓަރާއި ސެންޓިމީޓަރާއި 60 ސެންޓިމީޓަރާ ދެމެދުގެ ދިގުމިން ހުރެއެވެ.
މިމިޔަރު ކާނާގެ ގޮތުގައި ގިނައިން ކައިއުޅެނީ އެކި ބާވަތްބާވަތުގެ ފަރުމަހާއި، އިއްސާ، ބޯވައާއި ކަކުންޏެވެ. މިއީ މޫދަށް އެރިއުޅޭ މީހުންނަށް ނުރައްކާތެރި ޙަމަލާދީ އުޅޭ މިޔަރެއްނޫނެވެ. ނަމަވެސް އެންމަހުގެ ފިލިވަހަށް އައިސް ޙަމަލާދީ ހަދާކަމަށްވެއެވެ. މިމިޔަރުގެ މަތީބައިގެ ކުލައަކީ އަޅިމުށި ކުލައެކެވެ. ބައެއް މިޔަރުގައި ކަޅުކުލައިގެ ތިކިތަކެއް ދެއަރިމަތީގައި ހުރެދާނެއެވެ. މިޔަރުގެ ބުރަކަށިމަތީ ފުރަތަމަ އުރަހައިގެ ކޮޅުގައްޔާއި، ނިގޫފަތުގެ މަތީބައިގެ ކޮޅުގައި ފާހަގަކުރެވޭފަދަ ހުދުކުލައިގެ ދެލައްހުރެއެވެ.
އިނގިރޭސި ނަން: Whitetip reef shark
