ނައިބުރައީސް ފައިސަލް ނަސީމް ވަނީ އިއްޔެ ހުޅުމާލޭ ކަންނެލި ޖެޓީއަށް ޒިޔާރަތް ކުރައްވާފައެވެ. އަދި އެތަނުގައި ތިބި މަސްވެރިންނާ ބައްދަލު ކުރެއްވިއެވެ.
ނައިބުރައީސް ވަނީ މަސްވެރިންގެ ޝަކުވާތައް އަޑުއަހައި، އެ ކަންކަމަށް އަވަސް ހައްލެއް ގެނެސްދޭނެ ކަމުގެ ޔަގީންކަން ދީފައެވެ.
މަސްވެރިން މިފަހުން ކުރާ ޝަކުވާ ތަކަކީ، މަސްކިރޭ މިންވަރު ކޮންޓްރޯލް ކޮށްފައި އޮތުމާއި އައިސް ލިބުން ދަތިވުމުގެ މައްސަލައިގެ އިތުރުން މަސްކިރުން ލަސްވުމެވެ. އަދި މަސްވެރިކަން ތިޔާގި ވާއިރު އަގު ތިރިވާކަންވެސް މަސްވެރިން ފާހަގަ ކުރެއެވެ.
މަސްވެރިންގެ ދުވަހުގެ ގޮތުގައި ފާހަގަ ކުރަނީ ޑިސެމްބަރު 10 ވަނަ ދުވަހެވެ. މި މަހުގެ 10 ވަނަ ދުވަހު، ބޮޑުކަންނެލި މަސްވެރިކަމުގައި ހުރި ކަންބޮޑުވުންތައް ފާޅު ކުރުމަށް ޓަކައި ބޮޑުކަންނެލި މަސްވެރިންގެ ޔޫނިއަން (ބީކޭއެމްޔޫ)އިން ވަނީ ކަނޑުމަތީގައި މުޒާހަރާ ކޮށްފައެވެ. އެ މުޒާހަރާގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ބައިވެރިވެވަޑައިގަންނަވައި، މަސްވެރިންގެ ކަންބޮޑުވުންތައް އަޑު އެއްސެވިއެވެ.
އެގޮތުން ބޮޑު ކަންނެލި ކިރޭ އަގު އިތުރުކޮށް، މަސް ވިއްކޭނެ އިތުރު ގައުމުތަކަށް މާކެޓް ފުޅާ ކުރަން މަސައްކަތް ކުރައްވާނެ ކަމަށް ރައީސް ވިދާޅުވިއެވެ.
އަދި ބާނާ މަސް ތާޒާކަން މަތީ ދަމަހައްޓައި، ކޮލިޓީ ހިފެހެއްޓުމަށް ބޭނުންވާ އިތުރު 18 އައިސް ޕްލާންޓް ގާއިމު ކުރުމަށާއި މާލޭ ސަރަހައްދުގައި ބަނދަރު ކުރެވޭނެ އިންތިޒާމު އެޗްޑީސީއާ ގުޅިގެން ހަމަޖެއްސުމަށް މަސައްކަތް ކުރައްވާނެ ކަމަށްވެސް ރައީސް ވިދާޅުވިއެވެ.
މި ކަންކަމާ ގުޅިގެންވެސް މަސްވެރިން ތިބީ، އަވަސް މުސްތަގުބަލެއްގައި ރަނގަޅު ގޮތެއް ވާނެކަމަށް އުންމީދު ކޮށްގެންނެވެ.
