ހުއިފިލަނޑާގެ މަސްވެރިކަން ރާވައި، ހިންގައި ބެލެހެއްޓުމުގެ އެކަށީގެންވާ ނިޒާމެއް ނެތުމުގެ ސަބަބުން ހުއިފިލަނޑާގެ މަސްވެރިކަމުގައި ނަގާ ބާވަތްތަކާއި ، އެ ބާވަތްތަކުގެ ސައިޒްތަކާއި އާބާދިއަށް އައިސްފައިވާ ބަދަލުތައް ދެނެގަނެވިފައެއް ނުވެއެވެ.
މިކަންކަން ހައްލު ކުރުމަށާއި، މާޙައުލީ ނިޒާމުގެ ޖުމުލަ އުފެއްދުންތެރިކަމުގައި ހުއިފިލަނޑާ އަދާކުރާ އަސާސީ ދައުރަށާއި މަސްވެރި މުޖުތަމަޢުތަކާއި ޞިނާޢަތުގެ މަޞްލަޙަތަށް ބަލައި، ކަމާގުޅޭ އެންމެހައި ފަރާތްތަކާއި މުސްތަޤުބަލުގެ ޖީލުތަކުގެ މަންފާއަށް، މި މުހިންމު ވަސީލަތް ދެމެހެއްޓެނިވިގޮތެއްގައި ބެލެހެއްޓުމަށްޓަކައި، ބައިނަލްއަޤުވާމީ ފެންވަރުގައި ބަލައިގަނެފައިވާ އުސޫލުތަކާއި ބެލެހެއްޓުމުގެ އަވަސް ފިޔަވަޅުތަކެއް އެކަށީގެންވާ ވަގުތުގައި ތަޢާރުފުކުރުމަކީ މުހިންމު ކަމެކެވެ. މިގޮތުން، މި ޕްލޭންގައި ކަނޑައަޅައިފައިވާ އަމާޒުތަކާއި އިސްތިރާޖުތައް ހާސިލުކުރުމަށްޓަކައި އަޅާނެ ފިޔަވަޅުތައް ތިރީގައި މިވަނީއެވެ.
1. މިނިސްޓްރީއަށް ލަފާދޭ ކޮމިޓީއެއް އުފެއްދުން
ހުއިފިލަނޑާގެ މަސްވެރިކަމާއި މަސްވެރިކަމުގެ ވިޔަފާރި ބެލެހެއްޓުމާ ގުޅޭ ގޮތުންނާއި، ހުއިފިލަނޑާގެ އާބާދީ މެނޭޖްކުރުމަށް އަޅާނެ ފިޔަވަޅުތަކާ ގުޅޭ ގޮތުންނާއި، ހުއިފިލަނޑާގެ ދިރާސާތައް ކުރުމާ ގުޅޭ ގޮތުންނާއި، ހުއިފިލަނޑާގެ މަސްވެރިކަން ދެމެހެއްޓެނިވިގޮތެއްގައި ތަރައްޤީކުރުމަށް އަޅާނެ ފިޔަވަޅުތަކާ ގުޅޭގޮތުން މިނިސްޓްރީއަށް ލަފާ ދިނުމަށްޓަކައި ލަފާދޭ ކޮމިޓީއެއް ޤާއިމުކުރެވޭނެއެވެ. އަދި ކޮމިޓީގެ ޖަލްސާތައް މަދުވެގެން އަހަރަކު އެއް ފަހަރު ބޭއްވޭނެއެވެ.
ކޮމިޓީ އެކުލަވައިލާނީ ތިރީގައިވާ މެންބަރުންގެ މައްޗަށެވެ.
(ހ) މުޤައްރިރު (މިނިސްޓްރީގެ ފިޝަރީޒް ޑިޕާޓްމަންޓް ތަމްސީލު ކުރާ މަންދޫބެއް)؛
(ށ) އެމް.އެމް.އާރް.އައި ތަމްސީލު ކުރާ މަންދޫބެއް؛
(ނ) ހުއިފިލަނޑާ ނަގާ ފަރާތްތައް ތަމްސީލު ކުރާ 3 (ތިނެއް) މަންދޫބުން؛
(ރ) ހުއިފިލަނޑާ އެކްސްޕޯޓު ކުރާ ފަރާތްތައް ތަމްސީލު ކުރާ 2 (ދޭއް) މަންދޫބުން؛
(ބ) މިނިސްޓްރީ އޮފް އެންވަޔަރަންމަންޓް ތަމްސީލު ކުރާ މަންދޫބެއް؛
(ޅ) މިނިސްޓްރީ އޮފް އިކޮނޮމިކް ޑިވެލޮޕްމަންޓް ތަމްސީލު ކުރާ މަންދޫބެއް؛
(ކ) ލޯކަލް ގަވަރންމަންޓް އޮތޯރިޓީ ތަމްސީލު ކުރާ މަންދޫބެއް؛ އަދި
(އ) ދިވެހިރާއްޖޭގައި ރަޖިސްޓަރީކޮށްފައިވާ ކަމާގުޅޭ ޖަމްޢިއްޔާއެއް.
މީގެ ތެރެއިން އަންނަނިވި ފަރާތްތައް ކޮމިޓީއަށް ކުރިމަތިލުމުގެ ޝައުޤުވެރިކަން ފާޅުކުރުމަށް ހުޅުވައިލައި މިނިސްޓްރީން އާންމުކޮށް އަންގައި އިޢުލާން ކުރެވޭނެއެވެ.
(ހ) ހުއިފިލަނޑާގެ މަސްވެރިކަންކުރާ ފަރާތްތައް ތަމްސީލު ކުރާ މަންދޫބުން؛
(ށ) ހުއިފިލަނޑާގެ ބާވަތްތައް އެކްސްޕޯޓު ކުރާ ފަރާތްތައް ތަމްސީލު ކުރާ މަންދޫބުން؛
(ނ) ދިވެހިރާއްޖޭގައި ރަޖިސްޓަރީކޮށްފައިވާ ކަމާގުޅޭ ޖަމްޢިއްޔާ.
ކޮމިޓީގެ މަސްއޫލިއްޔަތުތަކުގެ ތެރޭގައި އަންނަނިވި ކަންކަން ހިމެނޭނެއެވެ.
(ހ) މި ޕްލޭން ތަންފީޛުކުރެވޭ ގޮތުގެ ތަފުސީލު އަހަރަކު އެއް ފަހަރު މިނިސްޓަރަށް އެރުވުން؛
(ށ) ހުއިފިލަނޑާގެ މަސްވެރިކަމާގުޅޭ ފަންނީ އަދި އެހެނިހެން ރިޕޯޓުތައް މުޠާލިޢާކުރުން؛
(ނ) ހުއިފިލަނޑާގެ މަސްވެރިކަމާގުޅޭ ފަންނީ ރިޕޯޓުތަކުންނާއި ކަމާ ގުޅޭ ފަރާތްތަކާއެކު ބޭއްވޭ މަސައްކަތު ބައްދަލުވުންތަކުން އަދި މަޝްވަރާ ބައްދަލުވުންތަކުން ނެރެވޭ ނަތީޖާތަކާއި ހުށަހެޅުންތަކާ ގުޅިގެން އަޅަންޖެހޭ މެނޭޖްކުރުމުގެ ފިޔަވަޅުތަކާ ބެހޭގޮތުން މިނިސްޓްރީއަށް ލަފާ ދިނުން؛
(ރ) ސަރަޙައްދީ ނުވަތަ ބައިނަލްއަޤުވާމީ ފެންވަރުގައި ހުއިފިލަނޑާގެ މަސްވެރިކަމާއި މަސްވެރިކަމުގެ ވިޔަފާރި މެނޭޖްކުރުމަށް އަޅާ ފިޔަވަޅުތައް ޤައުމީ ފެންވަރުގައި ތަންފީޛުކުރުމާ ގުޅޭގޮތުން މިނިސްޓްރީއަށް ލަފާދިނުން؛ އަދި
(ބ) މި ޕްލޭން ތަންފީޛުކޮށް، މުޠާލިޢާކޮށް މުރާޖަޢާކުރުމާ ގުޅޭގޮތުން މިނިސްޓްރީއަށް ލަފާ ދިނުން.
2. ލައިސަންސް ކުރުން
މަސްވެރިކަން ރާވައި، ހިންގައި ބެލެހެއްޓުމުގައި ލައިސަންސްކުރުމުގެ ނިޒާމެއް ޤާއިމުކުރުމުގެ އެންމެ ބޮޑު އެއް ބޭނުމަކީ މަސްވެރިކަމުގައި ހަރަކާތްތެރިވާ ފަރާތްތަކާއި އިޤުތިޞާދީގޮތުން މަސްވެރިކަމުގެ ވަސީލަތްތަކަށް ބަރޯސާވާ ފަރާތްތައް ދެނެގަތުމާއި، މަސްވެރިކަމުގެ ތަފާސްހިސާބު ބެލެހެއްޓުމެވެ. އަދި މަސްވެރިކަމުގެ ޞިނާޢަތް ތަރައްޤީކުރުމަށާއި މަސްވެރިންނަށް ފޯރުކޮށްދޭ ޚިދުމަތްތައް އެކަށީގެންވާ ގޮތެއްގައި ފޯރުކޮށްދިނުމަށްޓަކައި ބޭނުންވާ މަޢުލޫމާތު މިނިސްޓްރީއަށް ލިއްބައިދިނުމުގައި ލައިސަންސްގެ ނިޒާމު އިސް ދައުރެއް އަދާކުރެއެވެ.
މީގެ އިތުރުން މިފަދަ ލައިސަންސް ނިޒާމެއް ގާއިމުކޮށް، މަސްވެރިކަމާއި މަސްވެރިކަމުގެ ވިޔަފާރީގައި ހަރަކާތްތެރިވާ ފަރާތްތައް އެ ނިޒާމުގެ ތެރެއިން ރަސްމީކޮށް ރިކޯޑުކޮށް ބެލެހެއްޓުމަކީ މަސްވެރިންނާއި މަހާއި މަހުގެ އުފެއްދުންތައް ތައްޔާރުކުރާ ފަރާތްތަކުގެ ޙައްޤުތައް ރައްކައުތެރިކޮށްދީ އެ ފަރާތްތަކަށް ޙައްޤުވެގެންވާ އިޖުތިމާޢީ އަދި އިޤުތިޞާދީ ރައްކައުތެރިކަން ކަށަވަރުކޮށްދިނުމަށްޓަކައި އެޅޭ އެންމެ މުހިންމު އެއް ފިޔަވަޅެވެ. އަދި މިފަދަ ނިޒާމެއްގެ ތެރެއިން މަސްވެރިކަންކުރާ އުޅަނދުފަހަރާއި، އެ އުޅަނދުތަކުގައި ހަރަކާތްތެރިވާ ކެޔޮޅުންނާއި ފަޅުވެރިންގެ މަޢުލޫމާތު އަދި މަހުގެ އުފެއްދުންތައް އުފައްދާ ތަންތަނުގެ މަޢުލޫމާތު ބެލެހެއްޓުމަކީ ދިވެހިރާއްޖޭގައި ކުރެވޭ މަސްވެރިކަމަކީ އެކަށީގެންވާ ގޮތެއްގައި ރާވައި، ހިންގައި، ބަލަހައްޓަމުންގެންދާ މަސްވެރިކަމަކަށް ހެދުމަށާއި، ބައިނަލްއަޤުވާމީ ފެންވަރުގައި ބަލައިގަންނަ މަސްވެރިކަމަކަށްވުމަށް ވެސް މުހިންމު ފިޔަވަޅަކަށް ވެގެންދާނެ ކަމެކެވެ. މީގެ އިތުރުން މަސްވެރިކަމުގެ ތަރައްޤީގެ މަޝްރޫއުތައް ރޭވުމުގައިވެސް މިފަދަ ނިޒާމަކުން އެއްކުރެވޭ މަޢުލޫމާތުގެ ބޭނުން ކުރެވޭނެއެވެ.
މިގޮތުން، ހުއިފިލަނޑާގެ މަސްވެރިކަމާއި ހުއިފިލަނޑާގެ މަސްވެރިކަމުގެ ވިޔަފާރީގެ ހަރަކާތްތައް ހަރުދަނާ ނިޒާމެއްގެ ތެރެއިން މޮނިޓަރކޮށް ބެލެހެއްޓުމަށްޓަކައި ހުއިފިލަނޑާގެ މަސްވެރިކަމުގައްޔާއި ހުއިފިލަނޑާގެ މަސްވެރިކަމުގެ ވިޔަފާރީގައި ހަރަކާތްތެރިވަމުންދާ އަންނަނިވި ފަރާތްތައް ލައިސަންސްކުރެވޭނެއެވެ.
(ހ) ވިޔަފާރި ބޭނުމަށް ހުއިފިލަނޑާގެ މަސްވެރިކަންކުރާ އުޅަނދުފަހަރު؛
(ށ) ވިޔަފާރި ބޭނުމަށް ހުއިފިލަނޑާ ޕްރޮސެސްކުރުމުގައި ހަރަކާތްތެރިވާ ފަރާތްތައް (މީގެ ތެރޭގައި ސީރާކުރުމާއި، ކެއްކުމާއި ހިއްކުން ހިމެނޭހެން).
ލައިސަންސަށް އެދުމާއި، ދޫކުރުމާއި، އައުކުރުމާއި އަދި ބާޠިލުކުރުމުގައި ޢަމަލުކުރާނެ ގޮތާއި، ލައިސަންސްގެ މުއްދަތާއި ފީ އަދި ލައިސަންސް ލިބިފައިވާ ފަރާތްތަކުން ޢަމަލުކުރަންޖެހޭނެ ގޮތް ހުއިފިލަނޑާގެ މަސްވެރިކަން ރާވައި، ހިންގައި، ބެލެހެއްޓުމާބެހޭ ގަވާއިދުގައި ބަޔާންކުރެވޭނެއެވެ. މީގެ އިތުރުން، ހުއިފިލަނޑާގެ މަސްވެރިކަންކުރުމަށް ލައިސަންސް ދޫކުރެވޭ އެންމެހައި އުޅަނދުފަހަރާއި އުޅަނދުފަހަރުތަކުގެ ކެޔޮޅުންނާއި ފަޅުވެރީންގެ މަޢުލޫމާތު ހިމެނޭ ދަފުތަރެއް މިނިސްޓްރީން އެކުލަވައިލައި ބެލެހެއްޓޭނެއެވެ.
3. މަޢުލޫމާތު އެއްކުރުމާއި ބެލެހެއްޓުން
މަސްވެރިކަމުގައި ހިފާ މަހުގެ އާބާދީއަށް އަންނަމުންދާ ބަދަލުތައް ދެނެގަނެ، އާބާދީގެ މިންވަރު ހިސާބުކޮށް، އެ މަސްވެރިކަމެއް ކުރެވެނީ އާބާދީއަށް ގެއްލުން ނުވާ، ދެމެހެއްޓެނިވި މިންވަރެއްގައިކަން ކަށަވަރުކުރުމަށްޓަކައި މަސްވެރިކަމުގައި ބާނާ ބާވަތްތަކާއި އެ ބާވަތްތައް ބާނާ މިންވަރާއި، އެ ބާވްތައް ހިފުމަށް ކުރެވުނު ހޭދަ (އެފަރޓް) އާ ގުޅޭ މަޢުލޫމާތު އެއްކޮށް ބެލެހެއްޓުމަކީ މުހިންމު ކަމެކެވެ. މަސްވެރިކަމުގެ ތަފާސްހިސާބު ނެގުމުގައި އެންމެ މުހިންމު ދައުރެއް އަދާކުރަނީ މަސްވެރިކަމުގެ ލޮގްފޮތް ނުވަތަ މަސްރިޕޯޓެވެ. މަސްރިޕޯޓަކީ މަސްވެރިކަމުގެ ކޮންމެ ދަތުރެއް ނިންމުމަށްފަހު އެ ދަތުރުގައި ހިފި ބާވަތްތަކާއި އެ ބާވަތްތައް ހިފުމަށް ކުރެވުނު ހޭދައިގެ (އެފަރޓް) މަޢުލޫމާތު މަސްވެރިކަން ރާވައި، ހިންގައި ބަލަހައްޓާ ފަރާތްތަކަށް ފޯރުކޮށްދޭ ނިޒާމެވެ. މީގެ އިތުރުން މަސްވެރިކަމުގައި ހޭދަ ކުރެވުނު ތެލުގެ މިންވަރު އަދި މަސް ބޭނި ސަރަޙައްދުތައް ފަދަ އިތުރު މަޢުލޫމާތުވެސް ލޮގްފޮތް މެދުވެރިކޮށް ނެގެއެވެ. މީގެ އިތުރުން މަހާއި މަހުގެ އުފެއްދުންތައް އުފައްދާ ފަރާތްތަކުންނާއި މިފަދަ އުފެއްދުންތަކުގެ ވިޔަފާރިއާ ގުޅޭގޮތުން ވެސް ތަފާތު މަޢުލޫމާތު އެއްކުރެވެއެވެ. މި އެންމެހައި މަޢުލޫމާތަކީވެސް ދެމެހެއްޓެނިވި ގޮތެއްގައި މަސްވެރިކަން ކުރުމަށްޓަކައި އަދި މަސްވެރިކަމުގެ ނަފާ ދިގު މުއްދަތަކަށް ލިބިދިނުމަށްޓަކައި، މަސްވެރިކަން ރާވައި، ހިންގައި ބެލެހެއްޓުމަށް ބޭނުންކުރެވޭ މަޢުލޫމާ ތެވެ. މިގޮތުން، ހުއިފިލަނޑާގެ މަސްވެރިކަމާއި ހުއިފިލަނޑާގެ މަސްވެރިކަމުގެ ވިޔަފާރީގެ މަޢުލޫމާތު އެއްކުރެވޭނެ ހަރުދަނާ ނިޒާމެއް ޤާއިމުކޮށް، އަންނަނިވި ފަރާތްތަކުން މަސްވެރިކަމުގެ މަޢުލޫމާތު މިނިސްޓްރީއަށް ފޮނުވުން ލާޒިމުކުރެވޭނެއެވެ.
• މި ޕްލޭންގައި ބަޔާންކޮށްފައިވާ ލައިސަންސް ލިބިގެން މަސްވެރިކަންކުރާ އުޅަނދުފަހަރުން މަސް ރިޕޯޓު ނުވަތަ ލޮގް ފޮތުގެ މަޢުލޫމާތު ފޮނުވުން؛
• ހުއިފިލަނޑާ ގަނެ ޕްރޮސެސްކުރާ ފަރާތްތަކުން ހުއިފިލަނޑާ ގަނެފައިވާ ގޮތުގެ ތަފުސީލު (ޕަރޗޭސް ރިޕޯޓު) ފޮނުވުން؛ އަދި
• ހުއިފިލަނޑާގެ އުފެއްދުންތައް އެކްސްޕޯޓުކުރާ ފަރާތްތަކުން ހުއިފިލަނޑާ ގަނެފައިވާ ގޮތުގެ ތަފުސީލު (ޕަރޗޭސް ރިޕޯޓު) ފޮނުވުން.
4. ހުއިފިލަނޑާގެ މަސްވެރިކަމުގައި ވައިފުޅި އަޅައިގެން ފީނުން މަނާކުރުން
ހުއިފިލަނޑާއަކީ އާންމުކޮށް ހެލިފެލިވެނޫޅޭ ދިރުމެއް ކަމުން، އެއީ މަސްވެރިކަމުގެ އަސަރު ވަރަށް ފަސޭހައިން ކުރާ ބާވަތެކެވެ. ޚާއްޞަކޮށް، ވައިފުޅި އަޅައިގެން ފީނައިގެން މަސްވެރިކަން ކުރުމުގައި ނޭވާލުމަށް މައްޗަށް އަރަން ނުޖެހި، ގިނައިރު ފެނުގެ އަޑީގައި މަސްވެރިންނަށް އުޅެވޭތީ، ހުއިފިލަނޑާ ނެގޭ އަދަދު އެތައް ގުނައަކުން އިތުރުވެ، ހުއިފިލަނޑާގެ އާބާދީއަށް ނޭދެވޭ އަސަރުކުރުމަށް މަގު ފަހިވެގެން ދެއެވެ. މި ސަބަބަށްޓަކައި، އަދި ހުއިފިލަނޑާގެ އާބާދީ އާލާވުމަށް ފުރުޞަތު ދިނުމަށްޓަކައި، ޕްރިކޯޝަނަރީ ފިޔަވަޅެއްގެ ގޮތުން 1993 ވަނަ އަހަރު ދިވެހިރާއްޖޭގައި ވައިފުޅި އަޅައިގެން ފީނައިގެން ހުއިފިލަނޑާ ނެގުން
ވަނީ ރަސްމީކޮށް މަނާކުރެވިފައެވެ. އެހެންނަމަވެސް، އެކަން އެކަށީގެންވާ ގޮތަކަށް ތަންފީޛު ކުރެވިފައި ނުވާތީ ހުއިފިލަނޑާ ނެގުމަށް މިހާރުވެސް ވައިފުޅި އަޅައިގެން ފީނައެވެ. މިގޮތަށް ފީނާއިރު، ފީނުމުގެ މިންގަނޑުތަކާ ޚިލާފަށް ވަރަށް ފުން ހިސާބުތަކަށް (30 މީޓަރަށްވުރެ ފުނަށް) މަސްވެރިން ފީނައެވެ. މިކަމުގެ ސަބަބުން ވަރަށް ނުރައްކާތެރި ހާދިސާތައް ހިނގައި، ބައެއް މަސްވެރިންގެ ފުރާނައަށް ނުރައްކާވެ، އަދި ނުކުޅެދޭ ހާލަތަށް ބައެއް މަސްވެރިން ގޮސްފައިވާކަމީ ކަންބޮޑުވާންޖެހޭ ކަމެކެވެ.
ބެލެހެއްޓުމެއް ނެތި ކުރާ މަސްވެރިކަމުގެ ސަބަބުން ހުއިފިލަނޑާގެ އާބާދީއަށް ކުރާ ނޭދެވޭ އަސަރު ކުޑަ ކުރުމަށާއި، ހުއިފިލަނޑާގެ ބާވަތްތައް އާލާވުމަށް ފުރުޞަތު ދިނުމަށް އަދި ހުއިފިލަނޑާގެ މަސްވެރިކަމުގައި ދިމާވާ ހިރާސްތައް މަދުކުރުމަށްޓަކައި ހަރުދަނާ ފިޔަވަޅުތަކެއް އެޅުމަކީ މުހިންމު ކަމެކެވެ. މިގޮތުން، ވައިފުޅި އަޅައިގެން ނުވަތަ އެފަދަ ނޭވާލުމަށްޓަކައި ޕްރެޝަރައިޒްކޮށްފައި ހުންނަ ވައި ބޭނުންކޮށްގެން ފެނުގެ އަޑީގައި އުޅުމަށް ބޭނުންކުރާ އެއްވެސް އާލާތެއް ބޭނުންކޮށްގެން ހުއިފިލަނޑާ ނެގުން މަނާކޮށް، އެކަން ތަންފީޛުކުރެވޭނެއެވެ.
5. މަސްވެރިކަމުގެ ޙަރަކާތްތަކުގެ ސަބަބުން ތިމާވެށްޓަށް ކުރާ ނޭދެވޭ އަސަރު ކުޑަކުރުމުގެ ގޮތުން އަޅާ ފިޔަވަޅު
ހުއިފިލަނޑާ ކައްކައި، ޕްރޮސެސްކޮށް ނިމުމަށްފަހު، ހުއިފިލަނޑާ ކެއްކި ފެންގަނޑު އާންމުކޮށް އުކައިލަނީ ފަޅުތެރެއަށް ނުވަތަ ފަރުމައްޗަށެވެ. މިގޮތަށް މިކަން ކުރުމުން، އެ ފެންގަނޑުގައި ހުންނަ ހުއިފިލަނޑާގެ ވިހަ މާއްދާތަކުން ފަރުގައި އުޅޭ ދިރުންތަކަށް ނޭދެވޭ އަސަރު ކުރާކަން ވަނީ ފާހަގަކުރެވިފައެވެ (ބަރސް 2015 .(މިކަން ހައްލުކުރުމުގެ ގޮތުން، ހުއިފިލަނޑާ ސާފުކޮށް އަދި ކައްކައިފައި ބާކީވާ ފެންގަނޑު ރަށެއްގެ ފަޅުތެރެއަށް ނުވަތަ އުރަފަށުން ފެށިގެން ބޭރަށް އޮންނަ 300 މީޓަރުގެ ސަރަޙައްދުގެ ތެރެއަށް އެޅުން، ނުވަތަ އުކައިލުން މަނާކުރެވިގެންދާނެއެވެ.
6. ކެޗް ސެޓުފިކެޓު ދޫކުރުން
ޤާނޫނާ ޚިލާފަށް ރިޕޯޓުކުރުމެއް، އަދި ބެލެހެއްޓުމެއް ނެތި ކުރާ (އިލީގަލް، އަންރެގިއުލޭޓަޑް އެންޑް އަންރިޕޯޓެޑް - އައި.ޔޫ.ޔޫ) މަސްވެރިކަން ހުއްޓުވުމަށާއި، ދިވެހިރާއްޖޭގެ މަސްވެރިކަމުގެ ވިޔަފާރީގައި ބަދަލުކުރެވޭ މަހާއި މަހުގެ އެންމެހައި އުފެއްދުންތަކަކީ ހަރުދަނާ ނިޒާމެއްގެ ތެރެއިން ބެލެހެއްޓިފައިވާ މަސްވެރިކަމަކުން ބާނައި، ތައްޔާރުކޮށްފައިވާ އުފެއްދުންތަކެއްކަން ކަށަވަރުކުރުމަށްޓަކައި ކެޗް ސެޓުފިކެޓު ދޫކުރުމުގެ ނިޒާމެއް ޤާއިމުކުރުމަކީ މުހިންމު ފިޔަވަޅެކެވެ.
މިގޮތުން މިނިސްޓްރީން ޤާއިމުކޮށްފައިވާ ކެޗް ސެޓުފިކެޓު ދޫކުރުމުގެ ނިޒާމު ފުޅާކޮށް، އެކްސްޕޯޓު ކުރެވޭ ކޮންމެ ހުއިފިލަނޑާގެ އުފެއްދުންތަކުގެ ޝިޕްމަންޓަކާ އެކު މިނިސްޓްރީން ދޫކޮށްފައިވާ ކެޗް ސެޓުފިކެޓެއް އޮތުން ލާޒިމުކުރެވޭނެއެވެ. ކެޗް ސެޓުފިކެޓު ދޫކުރުމުގެ ނިޒާމު މެދުވެރިކޮށް އެކްސްޕޯޓުކުރާ ހުއިފިލަނޑާ ނަގައިފައިވާ އުޅަނދުގެ މަޢުލޫމާތާއި، ހުއިފިލަނޑާ ނެގި ތާރީޚު އަދި ހުއިފިލަނޑާ ޕްރޮސެސްކުރި ފަރާތުގެ މަޢުލޫމާތު އެއްކުރެވޭނެއެވެ. އަދި މި މަޢުލޫމާތުގެ އަލީގައި ހުއިފިލަނޑާ ނެގީއްސުރެ އޭގެ އުފެއްދުންތައް ގަންނަ ފަރާތްތަކަށް ފޯރުކޮށްދެވެންދެން އެ އުފެއްދުންތައް ކަޑައްތުކޮށްފައިވާ އެންމެހައި މަރުހަލާތައް ދެނެގަތުމަށް (ޓްރޭސަބިލިޓީ ޔަޤީންކުރުމަށް) މަގުފަހިވެގެންދާނެއެވެ.
7. ޕްރިކޯޝަނަރީ ފިޔަވަޅުތައް
ސައިންޓިފިކް ދިރާސާތަކުގެ އަލީގައި ހޯދައިފައިވާ ފުރިހަމަ މަޢުލޫމާތު ނެތް ހާލަތުގައި ނުވަތަ ވަކި ކަމެއް ޔަޤީންކުރެވިފައި ނެތް ހިނދުގައި ވެސް، ފިޔަވަޅެއް ނާޅައި ދޫކޮށްލުމުގެ ސަބަބުން ލިބިދާނެ ގެއްލުމަކަށް ރިޢާޔަތްކޮށް އަދި މޫސުމީ ބަދަލުގެ ސަބަބުން މާޙައުލީ ނިޒާމަށް ކުރާ ނޭދެވޭ އަސަރުތަކަށް ރިޢާޔަތްކޮށް، ޤުދުރަތީ ވަސީލަތްތައް ދެމެހެއްޓެނިވި ހަމަތަކުގެ ތެރެއިން ބެލެހެއްޓުމަށްޓަކައި ފިޔަވަޅު އެޅުމަކީ ގިނަ ސައިންސްވެރިންނާއި ޤުދުރަތީ ވަސީލަތްތައް މެނޭޖްކުރާ ފަރާތްތަކުން ބާރުއަޅާ ކަމެކެވެ. މިގޮތުން ހުއިފިލަނޑާގެ ސްޓޮކް މެނޭޖްކުރުމަށް މަތީގައި ބަޔާންކޮށްފައިވާ ފިޔަވަޅުތަކުގެ އިތުރުން އެހެނިހެން ފިޔަވަޅުތަކެއް އެޅުމަށް ފެނިއްޖެ ހާލަތުގައި އެފަދަ ފިޔަވަޅުތަކެއް އެޅުމަށް ނިންމިދާނެއެވެ. މީގެ ތެރޭގައި އަންނަނިވި ފިޔަވަޅުތައް ހިމެނެއެވެ.
(ހ) ދިވެހިރާއްޖޭގެ ވަކި ސަރަޙައްދަކުން ހުއިފިލަނޑާ ނެގުން މަނާކުރުން؛
(ށ) ހުއިފިލަނޑާގެ ވަކި ބާވަތެއް ނެގުން، ޕްރޮސެސްކުރުން ނުވަތަ އެކްސްޕޯޓުކުރުން މަނާކުރުން؛
(ނ) ނެގޭނެ ނުވަތަ އެކްސްޕޯޓު ކުރެވޭނެ ހުއިފިލަނޑާގެ ސައިޒް ލިމިޓްތަކެއް ކަނޑައެޅުން؛
(ރ) އެކްސްޕޯޓު ކުރެވޭނެ ނުވަތަ ނެގޭނެ ހުއިފިލަނޑާގެ ބާވަތްތަކުގެ ކޯޓާއެއް ކަނޑައަޅައި ތަންފީޛުކުރުން؛
(ބ) ހުއިފިލަނޑާގެ ސްޓޮކަށް އަސަރުކޮށްފާނެ ހަރަކާތްތަކާގުޅޭ ގޮތުން އެހެނިހެން ފިޔަވަޅުތައް އެޅުން.