ތ. ފުނައްޑޫ އޮޕަރޭޝަނަށްގެނައުމަށް ކުރަންޖެހޭ މަސައްކަތްތަކަށް 157 މިލިއަން ރުފިޔާ ޙަރަދުވާނެ ކަމަށާއި، އެތަނުން މަސް ގަންނަން ފެށޭނީ އަންނަ އަހަރުގެ މެއި މަހުގެތެރޭގައި ކަމަށް މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޑރ. ހުސައިން ރަޝީދު ހަސަން ވިދާޅުވެއްޖެއެވެ.
މިނިސްޓަރ މިހެން ވިދާޅުވީ ރައްޔިތުންގެ މަޖްލީހުގެ ތިމަރަފުށީ ދާއިރާގެ މެމްބަރު އަބްދުﷲ ރިޔާޒް ކުރެއްވި ސުވާލަކަށް ލިޔުމުން ދެއްވި ޖަވާބުގައެވެ.
އެގޮތުން ފިޝަރީޒް މިނިސްޓަރ ޑރ. ހުސެއިން ރަޝީދު ހަސަން ވިދާޅުވީ ފުނައްޑޫ އޮޕަރޭޝަނަށް ގެނައުމަށް އެރަށުގެ ބަނދަރުގެ ބޮޑު މަރާމާތެއް ކުރަންޖެހޭ ކަމަށެވެ. އަދި އެރަށަށް ގަންނަ މަސް އެކްސްޕޯޓުކުރުމަށް ނުވަތަ ރަށުން ބޭރު ކުރުމަށް މިކަމުގެ ސަބަބުން ބޮޑެތި ގޮންޖެހުންތަކެއް ހުރިކަންވެސް ވަނީ ފާހަގަކުރެވިފައި ކަމަށް މިނިސްޓަރ ވިދާޅުވިއެވެ.
ފިޝަރީޒް މިނިސްޓަރ ވިދާޅުވީ ބަނދަރު ހެދުމާއި އެކު މުޅި ފެސިލިޓީ އެއްކޮށް މަރާމާތުކޮށް، މަސް ގަނެވޭ ހާލަތަށް އެތަން ގެނައުމަށް ކުރަން ޖެހޭ މަސައްކަތްތަކަށް 10.2 މިލިއަން ޑޮލަރު ނުވަތަ 157.3 މިލިއަން ރުފިޔާ ޙަރަދުކުރަން ޖެހޭނެކަމަށް އަންދާޒާ ކުރެވޭ ކަމަށެވެ.
ފުނައްޑޫ އޮޕަރޭޝަނަށް ގެނައުމަށްޓަކައި ބޭނުންވާ ފައިސާ ހޯދުމާއި ގުޅޭ ގޮތުން މިނިސްޓްރީ އޮފް ފިނޭންސް އާއި އެކު މަޝްވަރާކޮށް، އެ މިނިސްޓްރީގެ މަޝްވަރާގެ މަތިން، މި ފައިސާއަކީ މިއަހަރުގެ ދައުލަތުގެ ބަޖެޓުގައި ހިމެނިފައިވާ ފައިސާއަށް ނުވާތީ އާއި މިވަގުތު ދައުލަތުގެ ކޭޝް ފްލޯގެ ހާލަތު ހުރި ގޮތުން މި މިންވަރަށް ފައިސާ ދޫކުރުމުގައި ދަތިތަކެއް ހުރުމުގެ ސަަބަބުން ބޭންކިންގ ނިޒާމްގެ ތެރެއިން، މިކަމަށް ބޭނުންވާ ފައިސާ ހޯދުމަށް މިފްކޯއަށް އަންގާފައިވާނެ ކަމަށް މިނިސްޓަރވަނީ ވިދާޅުވެފައެވެ.
އެހެންކަމުން މި ފައިސާ ލޯނުގެ ގޮތުގައި ހޯދުމަށް ރާއްޖޭގައި ހަރަކާތްތެރިވާ ބައެއް ބޭންކުތަކާއި އެކު މިފްކޯގެ ފަރާތުން، މިހާރު ދަނީ މަޝްވަރާކުރަމުންނެވެ. އެހެންނަމަވެސް މިފްކޯގެ މާލީ ހާލަތު ހުރި ގޮތުން މިފަދަ ލޯނެއް ނެގުމަށް ބޭނުންވާ ކަންތައް ހަމަޖައްސަން އަދި 2 މަސްދުވަސް ހޭދަވާނެ ކަމަށް ލަފާކުރެވޭ ކަމަށްވެސް ފިޝަރީޒް މިނިސްޓަރ ވިދާޅުވިއެވެ.
ފުނައްޑޫ އޮޕަރޭޝަނަށް ގެނައުމަށް ހިންގުނު އެސަސްމަންޓުގައިވާގޮތުން، 8 މަސްދުވަހުގެތެރޭގައި މަސައްކަތްތައް ނިންމާ ޙިދުމަތްދޭން ފެށޭނެ ކަމަށް ވަނީ އަންދާޒާކޮށްފައެވެ. އެހެންކަމުން ބޭނުންވާ ލޯނު ހަމަޖެހި ފުނައްޑޫއަށް މަަސް ގަންނަން މިހާރު އަންދާޒާ ކުރެވެނީ އަންނައަހަރުގެ މެއިމަހުގެތެރޭގައި ކަމަށްވެސް ފިޝަރީޒް މިނިސްޓަރ ވަނީ ވިދާޅުވެފައެވެ.
ފުނައްޑޫއަކީ މަސްގަނެ އެކްސްޕޯޓްކުރަން ހުއްދަދީގެން 2004 ވަނަ އަހަރު ތަރައްޤީކުރި ރަށެކެވެ. އެރަށް ތަރައްޤީކޮށް ފުރަތަމަ އެރަށުގައި މަސްގަނެ އެކްސްޕޯޓް ކުރަން ފެށީ އޭރުގެ ހޯމް މިނިސްޓަރު އަހުމަދު ތަސްމީނު އަލީގެ ފުނައްޑޫ ޓޫނާ ޕްރޮޑަކްޓްސްއިންނެވެ. އެރަށުގައި މަސްގަތުމުގެ އޮޕަރޭޝަން ފެށުމާއެކު އެސަރަހައްދުގައި މަސްކިރުމަށް ދިމާވި ދަތިތައް ހައްލުވެ މަސްގަތުމުގައި ވާދަވެރި ރޫހެއް އުފެދިގެން ދިޔައެވެ. ނަމަވެސް މަސްގަތުމުގެ އޮޕަރޭޝަން ފެށިތާ ހަތަރު އަހަރު ފަހުން 2008 ވަނަ އަހަރު ތަފާތު އެކި ސަބަބު ތަކަށްޓަކައި އެކުންފުނިން މަސްގަތުމުގެ އޮޕަރޭޝަން ހުއްޓާލިއެވެ.
އެރަށް ތަރައްޤީ ކުރަން ނެގި ލޯން ނުދެއްކުމުގެ ސަބަބުން ބޭންކް އޮޕް މޯލްޑިވްސްއިން އެރަށް ބޭންކުގެ ބެލުމުގެ ދަށަށް ގެންދިއުމަށްފަހު 2016 ގައި ކުންފުންޏަކާ ހަވާލުކުރިއެވެ. އެކުންފުނިން ގާތްގަނޑަކަށް އަހަރެއްހާ ދުވަހު މަސް ގަތުމަށްފަހު އެރަށް އަނެއްކާވެސް މަސްގަތުން ހުއްޓާލިއެވެ. އޭގެ ފަހުން އަނެއްކާވެސް އެރަށް އޮތީ ބޭންކް އޮފް މޯލްޑިވްސްގެ ބެލުމުގެ ދަށުގައެވެ. އަދި ސަރުކާރުން ވަނީ ބޭންކަށް ދައްކަންޖެހޭ ފައިސާ ދެއްކުމަށްފަހު އެތަން އޮޕަރޭޝަނަށް ގެނައުމުގެ މަސައްކަތް މިފްކޯއާއި ހަވާލުކޮށްފައެވެ.
