ނ ކެނދިކުޅުދޫގައި ޤާއިމްކުރާ ގޭދޮށު މަސް ފެކްޓްރީގެ މަސައްކަތް ޑިޒައިން އެންޑް ބިލްޑް އުސޫލުން ކޮށްދޭނެފަރާތެއް ހޯދުމަށް ފިނޭންސް މިނިސްޓްރީން އަލުން ޢިއުލާނުކޮށްފިއެވެ.
ފިނޭންސް މިނިސްޓްރީން ބުނީ ކެނދިކުޅުދޫގައި ގޭދޮށު މަސް ފެކްޓްރީއެއް ތަރައްޤީކުރުމަށް އަލުން ހުޅުވާލީ ކުރިން ކުރި އިޢުލާނަށް އެކަށީގެންވާ ތަރުހީބެއް ލިބިފައިނުވާތީ ކަމަށެވެ.
މި މަސައްކަތަށް ޝަރުތު ހަމަވާ ފަރާތްތައް ކަނޑައަޅާނީ ނޭޝަނަލް ކޮމްޕެޓިޓިވް ބިޑިންގެ އުސޫލުތަކުގެ މަތިން ކަމަށް ފިނޭންސް މިނިސްޓްރީން މައުލޫމާތުދެއެވެ. އަދި މިމަސައްކަތަށް އެކަށީގެންވާ ފަރާތެއް ހޮވުމަށް ބާއްވާ ބީލަމުގައި ބައިވެރިވެވޭނީ ހައުސިން މިނިސްޓްރީގެ "ޢިމާރާތްކުރުމުގެ ޢަމަލީ މަސައްކަތްކުރާ ފަރާތްތަކުގެ ޤަވާއިދު" ގައިވާ ގޮތުގެ މަތިން ރަޖިސްޓްރީވެފައިވާ ފަރާތްތަކަށް އެކަނިކަމަށްވެސް ފިނޭންސް މިނިސްޓްރީން މައުލޫމާތުދެއެވެ.
ބީލަމުގައި ބައިވެރިވުމަށް -/500 ރުފިޔާ (ފަސްސަތޭކަ ރުފިޔާ ( ގެ ނޮން-ރިފަންޑަބަލް ރަޖިސްޓްރޭޝަން ފީއެއް ދައްކަންޖެހެއެވެ. މި ފައިސާ ބަލައިގަންނާނީ 21 ޖޫން 2022 އިން 29ޖޫން 2022 އަށެވެ.
މި ޕްރޮޖެކްޓާއި ގުޅޭގޮތުން ސުވާލުކުރުމަށް އީމެއިލް ކުރަންޖެހެނީ 23 ޖޫން 2022ވާ ބުރާސްފަތި ދުވަހުގެ 13:00ގެ ކުރިން ކަމަށް ފިނޭންސްއިން ބުނެއެވެ. މި ޕްރޮޖެކްޓްގެ ބިޑް ސެކިއުރިޓީގެ ގޮތުގައި 30000 ރުފިޔާ ދައްކަންޖެހެއެވެ.
ކެނދިކުޅުދޫގައި ޤާއިމްކުރާ ގޭދޮށު މަސް ފެކްޓްރީގެ ބިޑު ހުޅުވުން ބޭއްވުމަށް ހަމަޖެހިފައިވަނީ އަންނަ މަހުގެ ތިނެއްވާ އާދިއްތަ ދުވަހުގެ 10:00 ގައި ފިނޭންސް މިނިސްޓްރީގެ ނެޝަނަލް ޓެންޑާގެ ޖަލްސާކުރާ މާލަމުގައެވެ.
ގޭދޮށު މަސް ފެކްޓްރީ މަޝްރޫއުގެ ބޭނުމަކީ ރާއްޖޭގައި ބާނާ މަހުގެ ތެރެއިން ކުންފުނިތަކަށް ނުގަނެވޭ މަސްތައް އުކާލުމުގެ ބަދަލުގައި ޕްރޮސެސްކޮށްގެން ރައްޔިތުންނަށް ނަފާ ހޯދައިދިނުމެވެ. މި މަޝްރޫއުގެ ދަށުން މަސް ފިނިކުރުމާއި މަހުން އެކި ތަފާތު އިތުރު އުފެއްދުންތައް ތައްޔާރުކުރުމުގެ ފުރުސަތުވެސް ފަހިކޮށްދޭނެއެވެ.
