ނިއުޒިލޭންޑުގައި އެންމެ ގިނަ އަދަދަކަށް ބާނާ އެއްބާވަތުގެ މަހަކީ އޮރެންޖު ރޯފީ މަހެވެ.
މިއީ ކަނޑުގެ ވަރަށް ފުނުން ބާނާ މަހެކެވެ. މިމަސް ބާނަނީ މަސްވެރިން ދާ ޖަހައިގެންނެވެ.
ކަނޑުގެ 1000 މީޓަރަށްވުރެ އަޑީގައި އުޅޭ އޮރެންޖު ރޯފީ މަހަކީވެސް ތަފާތު މަހެކެވެ. މި މަހަކީ ދިގު އުމުރެއް ލިބިފައިވާ މަހެކެވެ. އެގޮތުން އާއްމުކޮށް 150 އަހަރަށްވުރެ ގިނަ ދުވަހު އުޅެއެވެ.
މި މަހާއި ގުޅޭ ޝައުގުވެރި މައުލޫމާތުތަކެއް ނިއުޒިލޭންޑުގެ ސައިންސްވެރިން ދާދިފަހުންވަނީ ހޯދާފައެވެ. މީގެކުރިން ޤަބޫލްކުރެވިފައިވާ ގޮތުގައި އޮރެންޖް ރޯފީ މަސް ބިސް އަޅަނީ ގާތްގަނޑަކަށް އުމުރުން 21 - 31 އަހަރާއި ދެމެދުގައެވެ.
އެހެންނަމަވެސް ފަހުގެ ހޯދުންތަކުން އެނގުނު ގޮތުގައި މިމަސް ބިސް އަޅަނީ އުމުރުން 40 - 80 އަހަރާއި ދެމެދުގެ އަހަރު ތަކަކުގައެެވެ.
ސައިންސްވެރިންގެ މި ފަހުގެ ހޯދުންތަކާއި އެކު މި ބާވަތުގެ މަހުގެ ސްޓޮކް ދެމެހެއްޓުމުގައި ކުރާ މަސައްކަތަށް އެހީތެރިވެދޭނެއެވެ. އޮރެންޖް ރޯފީ އަކީ ކަނޑުގެ އެންމެ ފުން މިނުން މަސްވެރިން ބާނާ މަސްތަކުގެތެރޭގައި ހިމެނޭ މަހެކެވެ. އެގޮތުން ބިސް އަޅާ އުމުރު ލަސް ވުމުން މިމަހުގެ ސްޓޮކް ދެމެހެއްްޓެނެވި ގޮތެއްގައި ބެލެހެއްޓޭނީ ބާނާ މިންވަރު ކޮންމެވެސް ވަރަކަށް ލިމިޓުކޮށްގެން ކަމަށް ގިނަ ބަޔަކު ދެކެއެވެ.
އަދި ނިއުޒިލޭންޑަކީ ދުނިޔޭގައި އެންމެ ގިނަ އަދަދަކަށް މިމަހުގެ މަސްވެރިކަން ކުރާ ޤައުމަށްވުމުންވެސް އެމަހުގެ ސްޓޮކް ރަނގަޅަށް ބެލެހެއްޓުން މުޙިއްމެވެ.
