ވެލާ ބިސް އެޅުމަށް ހިމާޔަތްކޮށްފައިވާ ސަރަހައްދަކަށް ވަދެ، ގަވާއިދާ ހިލާފަށް އެތަނުގައި އިށީދެއިން މީހަކު ފުލުހުން ހައްޔަރުކޮށްފިއެވެ.
އެމެރިކާގެ މަޔާމީގެ ބީޗެއްގައި ވެލާ ބިސް އެޅުމަށް ހިމާޔަތްކޮށްފައިވާ ސަރަހައްދަށް ވަދެފައިވަނީ ބްރޭންޑަން ބޯވެން، 33 ނަމަކަށް ކިޔާ މީހެކެވެ. އޭނާ ވަނީ އެ ސަރަހައްދަށް ވަދެ ވެލާ ބިސް އެޅުމަށްފަހު ފަސް އަޅާފައި ހުރި ވަޅެއްގެ މަތީ ތުވާޔެއް އެޅުމަށްފަހު އެވަގުތު އެސަރަހައްދުގައި އަރުވަމުން ދިޔަ ހަވާ ބަލަން އެތާގައި އިށީދެފައެވެ.
އާއްމުންގެ ބައެއް މީހުން ނަގާފައިވާ ވީޑިއޯތަކުން ފެންނަ ގޮތުގައި އޭނާވަނީ އެތަނުން އޭނާ ނުކުތުމަށް އެދުނު މީހުންނާއި ވަރަށް ހުތުރު ބަހުން ވާހަކަދައްކާފައެވެ.
ފުލުހުން އެސަރަހައްދަށް އައުމުން އޭނާވަނީ ވެލާ ބިސް އަޅާ ސަރަހައްދަށް ނުވަންނަ ކަމަށް ބުނެފައެވެ. އެހެންނަމަވެސް އާއްމުންގެ ގިނަ ބަޔަކު އޭނާ އުޅުނު ގޮތުގެ ވީޑިއޯތައް ނަގާފައިވުމުން، އެ ވީޑިއޯތަކަށް ބެލުމަށްފަހު ފުލުހުންވަނީ އޭނާ ހައްޔަރުކޮށްފައެވެ.
ފުލުހުން ބުނީ ބޯވެން އިށީދެގެން އިން ސަރަހައްދުގައި 'ޑު ނޮޓު ޑިސްޓަރބު ސީ ޓަރޓަލް ނެސްޓު' ޖަހާފައި ހުންނަ ބޮޑު ބޯޑެއް ހަރުކޮށްފައި ހުރި ކަމަށެވެ.
ވެލާއަކީ ފްލޮރިޑާގެ ފެޑެރަލް އެންޑޭންޖަރޑު ސްޕީސީސް އެކްޓު 1973 އަދި ފޮރިޑާ މެރިން ޓަރޓަލް ޕްރޮޓެކްޝަން އެކްޓްގެ ދަށުން ހިމާޔަތްކޮށްފައިވާ އެއްޗެކެވެ.
