އާއިލާ އާއި އެކު މަސްވެރިކަމަށް ނިކުމެ އުޅުމަކީ މަޖާ އަދި ޝައުގުވެރިކަމެކެވެ. އެހެން ނަމަވެސް މިފަދަ މަސް ދަތުރުތަކުގައިވެސް މަދުން ނަމަވެސް އާދަޔާ ހިލާފު ތަޖުރިބާތައް ބައެއް މީހުންނަށް ކުރެވިފައި އެބަހުއްޓެވެ. އެގޮތުން ދާދިފަހުން އެމެރިކާގެ އަލަބާމާގައި މަސްވެރިކަމަށް ދިޔަ އާއިލާއެއްގެ ބޯޓު ތެރެއަށް ވަނީ ބޮޑު ވައިފިޔަ މަޑިއެއް ފުއްމާލާފައެވެ.
އޭޕްރީލް ޖޯންސްއާއި އޭނާގެ ފިރިމީހާ ޖާމީ ޖޯންސް އަދި އާއިލާގެ ބައެއް މެމްބަރުން މަސް ދަތުރެއް ދިޔައީ ގަލްފް އޮފް މެކްސިކޯއަށެވެ. އަދި މަސް ދަތުރުގެ ތެރެއިން ބޯޓަށް ފުއްމާލި ވައިފިޔަ މަޑި ޖެހުނީ އޭޕްރީލްގެ ގައިގައެވެ.
އޭޕްރީލް ފުރަތަމަ ހީކުރީ އޭނާގެ ގައިގައި ބޮޑު ރާޅެއް ޖެހުނީ ކަމަށެވެ. އެހެން ނަމަވެސް ޖެހުނު ބާރު މިނާއެކު އޭނާ އަށް ކުޑަކޮށް އެނބުރުންވެސް އެރިއެވެ. އަދި ބޯޓުގައި ތިބި އެންމެން ހަޅޭއްލަވަން ފެށިއެވެ.
ފިޔަގަނޑުގައި 5 ފޫޓު ހުރި މި ވައިފިޔަ މަޑީގެ ބަރުދަނުގައި 136 ކިލޯ ހުންނާނެ ކަމަށް ބެލެވެއެވެ. ބޯޓުގައި މަޑި ޖެހުމާއި އެކު އޭތި ސަލާމަތްވުމަށް ދިޔައީ މަސައްކަތްކުރަމުންނެވެ. އަދި އޭޕްރީލްމެން މަހަށް ދިޔައީ ކުޑަ ބޯޓެއްގައި ކަމަށްވުމުން، އެހާ ބޮޑު މަޑިއެއް ބޯޓަށް ފުއްމާލުމުން ބޯޓުވެސް އޮތީ ކޮންމެވެސް ވަރަކަށް އަޑިއަށް ގޮސްފައެވެ.
އެ ބޮޑު މަޑިއާއި އެކު ބޯޓު ކައިރީގައި އޮތް ޑައުފިން އައިލެންޑަށް ކައިރިކޮށް، އެތަނުގައި ތިބި މީހުންގެ އެހީތެރިކަމާއި އެކު މަޑިވަނީ މޫދަށް ދޫކޮށްލާފައެވެ. ބޯޓު ތެރެއަށް ފުއްމާލި މަޑި އަކީ ބަނޑުބޮޑު މަޑިއެކެވެ. އޭތި ބޯޓުން ކަނޑަށް ދޫކޮށްލުމަށްފަހު ބޯޓު ތެރެއިން ވަނީ ކުޑަ 4 މަޑި ފެނިފައެވެ. އެހެންނަމަވެސް މި މަޑިތައްވަނީ މަރުވެފައެވެ. މި ކުދި މަޑިތައް ވަނީ އާއްމުންނަށް ދައްކާލުމަށް ޑައުދިން އައިލެންޑުގެ ސީ ލެބްގައި ބަހައްޓާފައެވެ.
