ރާއްޖޭގައިކުރާ ދޮށީގެ މަސްވެރިކަމަށާއި ވަދު މަސްވެރިކަމަށް އަމާޒްކޮށް ޤާއިމްކޮށްފައިވާ ކަނދުފަތީގެ ވިޔުގައިން އެކި ސަބަބުތަކާއިހުރެ ކަނޑައިގެން ގޮސްފައިވާ ކަނދުފަތިތައް ޤާއިމްކުރުމުގެ މަސައްކަތް ފިޝަރީޒް މިނިސްޓްރީން ފަށައިފިއެވެ.
ފިޝަރީޒް މިނިސްޓްރީން ވިދާޅުވީ، މިހާތަނަށް އެކި ކައުންސިލް އިދާރާތަކުން މިނިސްޓްރީ އަށް މަޢުލޫމާތު ދީފައިވާ ގޮތުގައި 8 ކަނދުފަތި ވަނީ ކެނޑިފައެވެ. އެއީ ހއ. ފިއްލަދޫ، ށ. ކޮމަންޑޫ، ޅ. ފާދޫ، ކ.ކާށިދޫ، ކ.މާފުށި، އއ.އުކުޅަސް، ތ.ހިރިލަންދޫ ، ހިމެނޭ ސަރަހައްދުގައި އަޅާފައިވާ ކަނދުފަތިތަކެވެ.
މި ކަނދުފަތިތަކުގެ ތެރެއިން 5 ކަނދުފައްޗެއް އެޅުމުގެ މަސައްކަތް ކުރުމަށް މި މިނިސްޓްރީގެ ކަނދުފަތި ޓީމުން މިހާރު ވަނީ ދަތުރު ފަށާފައެވެ. މި ބުރުގައި އެޅުމަށް ހަމަޖެހިފައިވަނީ:
- ހއ. ފިއްލަދޫ، ށ.ކޮމަންޑޫ، ޅ. ފާދޫ، ކ.މާފުށި އަދި އއ. އުކުޅަހުގެ ކަނދުފަތިއެވެ.
އަދި ބާކީ ހުރި ކަނދުފަތިތައް އެޅުމަށް މިނިސްޓްރީގެ ޓެކްނިކަލް ޓީމް މިހާރު ދަނީ ތައްޔާރުވަމުންކަމަށްވެސް އެމިނިސްޓްރީން ވިދާޅުވެއެވެ. ފިޝަރީޒް މިނިސްޓްރީން ވިދާޅުވީ ދިވެހިރާއްޖޭގައި މަސްވެރިންނަށް ޤާއިމުކޮށްދެވިފައިވާ ކަނދުފަތީގެ ވިޔުގާގައި ހިމެނޭ ބައެއް ކަނދުފަތި ކަނޑައިގެން ދާ އެއް ސަބަބަކީ އުޅަނދުފަހަރު އެ ކަނދުފަތީގައި ވާ އައްސައި ބަނދެގެން ތިބުންކަން ފާހަގަކުރެވިފައިވާ ކަމަށާއި، މިފަދަ ކަންކަން ނުކުރުމަށް މަސްވެރިންނަށް އިލްތިމާސްކުރަ ކަމަށެވެ. އަދި މިފަދަ ކަންކަން ކުރާ ފަރާތްތައް އިނގޭނަމަ އެކަން ކުރާ ފަރާތްތަކުގެ މަޢުލޫމާތު ހިއްސާކުރުމަށް ފިޝަރީޒް މިނިސްޓްރީންވަނީ އެދިފައެވެ.
