އޮސްޓްރޭލިއާގެ ބީޗަކުން ސަލާމަތްކުރި ކުޑަ ވެލައެއްގެ ބަނޑުގައި ފުރެންދެން ހުރީ ޕްލާސްޓިކް ކަމަށް ސިޑްނީގެ ޓަރޮންގާ ވައިލްޑްލައިފް ހޮސްޕިޓަލުން ހާމަކޮށްފިއެވެ.
އޮސްޓްރޭލިއާގެ ޓަމަރަމާ ބީޗުން ސަލާމަތްކުރި އެންމެ 127 ގްރާމްގެ މި ވެލާއަށް ފަރުވާދެމުންދަނީ އެ ސިޑްނީގެ ޓަރޮންގާ ވައިލްޑްލައިފް ހޮސްޕިޓަލުގެ އިންޓެންސިވް ކެއަރގައެވެ. އެ ހޮސްޕިޓަލުގެ ނަރުހެއް މައުލޫމާތުދޭގޮތުގައި މި ކުޑަ ވެލާ ފެނިފައިވަނީ މޫދުގައި ބޯކޮޅު މައްޗަށް އޮއްވާ ކަމަށެވެ. އަދި އޭގެ ފަހަތު ފިޔަ ފަތް މަދު ކަމަށާއި، ފަތްގަނޑުގެވެސް ތަންކޮޅެއް މަދު ކަމަށެވެ. އަދި ބޮޑަށް ލަފާކުރެވެނޭ އެހެން މަހެއް އޭތި ކާލަން އުޅެފައިވާ ކަމަށްވެސް އޭނާ ބުންޏެވެ.
ހޮސްޕިޓަލަށް ގެނައިމަށްފަހު ކުޑަ ވެލާގެ ވަނީ ސިއްޙީ ފުރިހަމަ އެސެސްމަންޓެއް ހަދާފައެވެ. އަދި ވެލާގެ ފަހަތު ފިޔަ މަދު ނަމަވެސް، މޫދުަގައި ފީނާ އުޅުމުގައި އެއަށް ދަތިކަމެއް ނެތްކަން ވަނީ ފާހަގަކުރެވިފައެވެ. އެހެންނަމަވެސް އެ ވެލާގެ ސިއްޙަތައް އޮތް އެންމެ ބޮޑު ނުރައްކަލަކީ ގިނަ އަދަދަކަށް ޕްލާސްޓިކް ކެވިފައިހުރުން ކަމަށް ޑޮކްޓަރުން ހާމަކުރެއެވެ.
އެގޮތުން 6 ދުވަސްވަންދެން އެ ވެލާ ބޮޑުކަމުގެ ގޮތުގައި ބޭރުކޮށްފައިވަނީ ޕްލާސްޓިކެވެ. މިކަމުންވެސް ޕްލާސްޓިކް މޫދަށް އުކާލުމުން ކަނޑުގެ ދިރުންތަކަށް ވަމުންދާ ގެއްލުންތައް ދައްކުވައިދޭކަމަށް އެ ހޮސްޕިޓަލުން ބުނެއެވެ.
ވެލާއަށް ބޭނުންވާ ފަރުވާތަށް ދިނުމަށްފަހު އޭގެ ސައިޒުވެސް އެކަށީގެންވާ ވަރަކަށް ބޮޑުވުމުން މޫދަށް އަނބުރާ ދޫކޮށްލުމަށްވަނީ ހަމަޖެހިފައެވެ.
