އޮސްޓްރޭލިއާގެ މަސްވެރިއެއް އާދަޔާ ހިލާފަށް ބޮޑު ފަރުމަހެއް ބާނައިފިއެވެ.
އޮސްޓްރޭލިއާގެ ކުއީންސްލޭންޑަށް ނިސްބަތްވާ މަސްވެރިއާ، ބާނާފައިވަނީ ކަނޑުގެ ވަރަށް އަޑީގައި އުޅޭ ފާނައިގެ ބާވަތެކެވެ. އެގޮތުން އޭނާ ބޭނި މަހުގެ ދިގުމިނުގައި 175 ސެންޓިމީޓަރު ހުރި އިރު، ބަރުދަނުގައި 80 ކިލޯ ހުއްޓެވެ.
މި ވަތްތަރުގެ ފާނަ އާއްމުގޮތެއްގައި އުޅެނީ ކަނޑުގެ 250 އާއި 600 މީޓަރާއި ދެމެދުގެ ފުން މިނެއްގައެވެ. މި މަހާއި އެކު މަސްވެރިއާ ނަގާފައިވާ ފޮޓޯތަކަށް ސޯޝަލް މީޑިއާގައި ބޮޑު ސަމާލުކަމެއް ލިބިފައިވާއިރު، އޭނާ މި މަސް ބޭނުމަށް ގިނަ މަސައްކަތްތަކެއްް ކޮށްފައިވާނެ ކަން މީހުން ފާހަގަކުރެއެވެ.
އަދި 14 ކިލޯގެ މަސް ބޭނުމަށް ބޭނުން ކުރާ ކަންވާރެއް ބޭނުންކޮށްގެން މިހާ ބަރު މަހެއް ބާނާފައިވާތީވެސް ގިނަ ބައެއްގެ ޝައުގުވެރިކަން ވަނީ މިކަމަށް ލިބިފައެވެ.
ތައުރީފުކުރާ މީހުންގެ އިތުރަށް މިކަމަށް ފާޑުކިޔާ މީހުންވެސް މަދެއް ނޫނެވެ. އެގޮތުން ބައެއް މީހުންވަނީ މިފަދަ މަސްތައް ހިފުމަކީ ރަނގަޅު ކަމެއް ނޫން ކަމަށާއި، އޭނާ އޭތި އަނބުރާ މޫދަށް ދޫކޮށްލި ކަމަށް އުއްމީދުކުރާ ކަމަށް ބުނެ ކޮމެންޓުކޮށްފައެވެ.
އެހެންނަމަވެސް ބައެއް މީހުން ކޮމެންޓުކޮށްފައިވާގޮތުގައި، ކަނޑުގެ މިހާ އަޑީގައި އުޅޭ މަހެއް ކަނޑުން މައްޗަށް ނެގުމަށްފަހު އަނބުރާ ކަނޑަށް ދޫކޮށްލި ނަމަވެސް އޭތި ސަލާމަތުން އިތުރު ދުވަސްތަކެއް ވަންދެން ދިރި ހުރުމަކީ ނާދިރުކަމެއް ކަމަށް ބުނެފައެވެ.
