އިނގިރޭސިވިލާތުގެ ލިންކޮންޝިއާގެ ބީޗުގެ ވެލިގަނޑުގެތެރޭގައި ވިހަ ގަދަ މަހެއް އުޅޭތީ އާއްމުން ސަލާމުވާން އިލްތިމާސްކޮށްފިއެވެ.
ބީޗުގެ ވެލިގަނޑުގައި އުޅޭ ވީވާ ފިޝްއަކީ އޭގެ ސައިޒުގެ ގޮތުންނާއި، ގައިގެ ކުލައިގެ ގޮތުން ދެނެގަންނަން އުނދަގޫ މަހެކެވެ. އެގޮތުން އޭތީގެ ގައިގެ ކުލަ ބީޗުގެ ފަސްގަނޑާ އެއް ކުލައެކެވެ. އަދި އޭގެ ގައި މައްޗަށް އެރިއްޖެ ނަމަ، އޭގެ ޑިފެންސް މެކޭނިޒަން ހުންނަ ގޮތުން މަތީ ފަންގަނޑުގައި އިންނަ ވިހަ ގަދަ ކައްޓެއް މީހާގެ ފަޔަށް ހަރާލެވެެ.
ބީޗުގައި މިބާވަތުގެ މަސްތައް ގިނަވެފައިވާއިރު، ރޯޔަލް ނޭޝަނަލް ލައިފްބޯޓު އިންސްޓިޓިއުޓުންވަނީ ބީޗުގައި އުޅޭއިރު ބޫޓަށް ނުވަތަ ފައިވާނަށް އަރައިގެން އުޅުމަށް އެދިފައެވެ. އަދި ވީވާ މަހެއްް ކަށި ޖަހައިފިނަމަ، ލަސްނުކޮށް، ބީޗުގައި ހަރަކާތްތެރިވާ ލައިފްގާޑުންނަށް އެކަން އަންގާ، ސިއްހީ އަވަސް ފަރުވާ ހޯދަންޖެހެއެވެ.
ވީވާ ފިޝް ކަށި ޖެހުމުން އިންތިހާއަށް ތަދު އިހްސާސްވާނެއެވެ. އަދި އަވަސް ފަރުވާ ދެވިއްޖެނަމަ، އެހާ ބޮޑު ގެއްްލުމެއްވެސް ނުވާނެ ކަމަށް ލައިފް ބޯޓު އިންސްޓިޓިއުޓުން ބުނެއެވެ.
