ޗައިނާގެ ކޯރެއްގައި ބިރުވެރި މަހެއް އުޅޭތީ އެމަސް ހޯދުމަށް މުޅި ކޯރުގައި 'އަތް ފުނާ' އަޅަން ފަށައިފިއެވެ.
ޗައިނާގެ ހުނާން ޕްރޮވިންސްގެ ޕާކެއްގައިވާ ކޯރަކުން އެމެރިކާގައި އުޅޭ ބިރުވެރި ސިފައެއް ޖަހާ މަހެއް ކަމަށްވާ އެލިގޭޓަރ ގާ އެއް ފުރަތަމަ ފެނުނީ މިދިޔަ މަހުގެ މެދުތެރޭގައެވެ. މިމަސް ހިފުމަށް އެކި ގޮތްގޮތަށް މަސައްކަތް ކޮށްފައިވެއެވެ. އެހެން ނަމަވެސް ކާމިޔާބު ވާގޮތެއް ނުވިއެވެ.
އަށްޑިހަ ސެންޓިމީޓަރުގެ މި މަސް ހިފުމަށް ކަމާއިގުޅޭ އިދާރާތަކުން ވަނީ 200000 ކިއުބިކް މީޓަރުގެ އެ ކޯރުގެ ފެންގަނޑު ހިންދާލާފައެވެ. މިމަސް ހިފުމަށް ކުރަމުންދާ މަސައްކަތްތައްތަކަށް ގިނަ ބައެއްގެ ސަމާލުކަންވަނީ ލިބިފައެވެ. ޗައިނާގެ ގިނަ އަދަދެއްގެ މީޑިއާތަކުން މި ހަރަކާތްދަނީ ހަބަރުތަކުގައި ގެނެސްދެމުންނެވެ. އަދި ލައިވްކޮށްވެސް ދަނީ މި މަސް ހޯދުމުގެ މަސައްކަތް ގެނެސްދެމުންނެވެ.
އެލިގޭޓަރ ގާ އެއް އިންސާނަކަށް ހަމަލާ ދިނުމަކީ ނާދިރުކަމެކެވެ. އެހެން ނަމަވެސް މިއީ ސައިޒުގެ ގޮތުން ތިން މީޓަރަށް ބޮޑުވާ މަހަކަށްވުމުން، އެ ހިސާބުގައި އުޅޭ މީހުންނަށާއި، އެހެން ދިރުންތަކަށް މިމަހުގެ ސަބަބުން ބިރުވެރިކަމަކާއި ކުރިމަތިލާން ޖެހިދާނެއެވެ.
މިދިޔަ ބުރާސްފަތި ދުވަހު ކޯރުގެ ފެންގަނޑު ހުސްކޮށްފައިވާއިރު، އަދިވެސް އެ މަސް ނުފެނެއެވެ. މަސް ހޯދުމުގެ މަސައްކަތް ކުރާ ފަރާތްތަކުން ޤަބޫލުކުރާ ގޮތުގައި މިމަސް މިހާރު އޮތީ ކޯރުގެ ވަރަށް އަޑީގައި އޮތް ޕައިޕް ލައިނެއްގެ ދަށުގައި ފިލައެވެ.
ފެންގަނޑު ހިނދުމަށާއި މި މަސް ހިފުމަށް ކަމާގުޅޭ އިދާރާތަކުން ގިނަ މަސައްކަތްތަކެއް ކުރަމުން ދާއިރު، މި ހަރާކްތަށް ބައެއް މީހުންގެ ފާޑުކިޔުންތައްވެސް ދަނީ އަމާޒު ވަމުންނެވެ. އެގޮތުން އެންމެ މަހެއް ހޯދުމަށް އެހާ ބޮޑު ހަރަދެއް ކުރުމަކީ އެންމެ ރަނގަޅު ގޮތް ކަމާއި މެދު މީހުން ވަނީ ސުވާލު އުފައްދާފައެވެ.
ތޫނު ދަތްތަކެއްް ހުންނަ އެލިގޭޓަރ ގާ މަހަކީ ޗައިނާއިން ފެންނަ ބާވަތުގެ މަހެއް ނޫނެވެ. މިމަސް ޗައިނާއަށް އެތެރެވެފައިވަނީ ގަވާއިދާ ހިލާފަށް ޕެޓެއްގެ ގޮތުގައި ކަމަށް ބެލެވެއެވެ.
