ބަހަމާސްގައި މިޔަރެއް ހަމަލާ ދިނުމުގެ ސަބަބުން 58 އަހަރުގެ އަންހެނެއް މަރުވެއްޖެއެވެ.
އެމެރިކާގެ ޕެންސިލްވޭނިއާއަށް ނިސްބަތްވާ އެ އަންހެން މީހާ ބަހަމާސްއަށް ގޮސް އުޅުނީ ކްރޫސް ޝިޕެއްގައެވެ. އެގޮތުން ބަހަމާސްއަށް މަޑުކުރުމަށްފަހު އެކި ކަހަލަ އެކްސްކާޝަން ދަތުރުތައް ވަނީ ކުރިއަށްގެންގޮސްފައެވެ. ބަހަމާސްގެ ޓުއާ ކޮމްޕެނީއަކާއި އެކު އެ ސަރަހައްދުގައި މަޝްހޫރު ސްނޯކްލިންގު މަންޒިލަކަށް ދިޔައީ އެތަން ފީނާ ބަލާލުމަށެވެ.
ފީނަން އުޅުމުގެ ތެރޭގައި އޭނާއަށް މިޔަރު ހަމަލާ ދިން އިރު އާއިލާގެ ބައެއް މީހުންނަށާއި، ޓުއަރ ކުންފުނީގެ ބައެއް މީހުންނަށް އެ މަންޒަރު ފެނިފައިވެއެވެ. އަދި އޭނާ ސަލާމަތް ކުރުމަށް މަސައްކަތް ކޮށްފައިވެއެވެ. އެހެން ނަމަވެސް އެއްގަމާއި ހަމައަށް އެމީހާ ގެނެވުނު އިރު ވަނީ މަރުވެފައެވެ.
މަންޒަރު ދުށް ފަރާތްތަކުން ބުނެފައިވަނީ އަންހެން މީހާގެ ހަށިގަނޑަށް ފުން ޒަހަމްތަކެއް ލިބިފައިވާ ކަމަށެވެ. އަންހެން މީހާއަށް ހަމަލާދީފައިވާ ސްކޯންލިންގު ޕޮއިންޓުގައި 2019ވަނަ އަހަރުވެސް މިފަދަ ހާދިސާއެއް ހިނގާފައިވެއެވެ. އެގޮތުން އެ ހާދިސާގައި 21 އަހަރުގެ އަންހެނަކަށް މިޔަރެއް ވަނީ ހަމަލާދީފައެވެ.
