ފާއިތުވީ 30 އަހަރުތެރޭ 1.1 މިލިއަނަށްވުރެ ގިނަ ވެލާ ގަވާއިދާ ހިލާފަށް މަރާލާފައިވާކަމަށް އާ ހޯދުންތަކަކުން ހާމަވެއްޖެއެވެ.
އެރިޒޯނާ ސްޓޭޓު ޔުނިވަރސިޓީގެ ސަައިންސްވެރިން 65 ޤައުމަކުން އެއްކޮށްފައިވާ މައުލޫމާތުތަކުން ދައްކާގޮތުން ވެލާ ހިމާޔަތްކުރުމަށް ގައުމުތަކުގައި ގާނޫނުތަކާއި ގަވާއިދުތައް ހަދާފައި ހުރި ނަމަވެސް، އެ ޤައުމުތަކުގައި އަހަރަކު 44000 ވެލާ ގަވާއިދާ ހިލާފަށް މަރާލާފައިވެއެވެ.
އާއްމުގޮތެއްގައި ވެލާ މަރަނީ، ކެއުމަށް ބޭނުން ކުރުމަށާއި، އޭގެން ބޭސް ތައްޔާރުކުރުމުގެ އިތުރަށް ގަހަނާ ފަދަ ތަކެތި ހެދުމަށެވެ. ދިރާސާކުރިއަށް ގެންދިޔަ ފަރާތްތަކުން ވަނީ، ގަވާއިދާ ހިލާފަށް ވެލާ މެރުމާއި ގުޅޭ 209 ޖަރނަލް އާޓިކަަލާއި، ނޫސްތަކުގައި ހުރި އާޓިކަލްތަކާއި، ސުވާލު ކަރުދާސްތައް މެދުވެރިކޮށް މައުލޫމާތު އެއްްކޮށްފައެވެ.
ދިރާސާއިން ހާމަވި ގޮތުގައި، ދެކުނު އިރުމަތީ އޭޝިއާ އަދި މަޑަކަސްކަރު އަކީ ވެލާ ޝިކާރަކޮށް އޭގެ ވިޔަފާރި އެންމެ ފުޅާ ދާއިރާއެއްގައި ކުރަމުންދާ ހިސާބުތަކެވެ. އަދި މީގެތެރެއިންވެސް ވިއެޓްނާމްއަކީ، އެއް ޤައުމަކުން އެންމެ ގިނަ އަދަދަކަށް ގަވާއިދާ ހިލާފަށް ވެލާ ޓްރެފިކްކުރާ ޤައުމެވެ. މީގެއިތުރުން ޗައިނާ އާއި ޖަޕާނަކީ އެންމެ ގިނަ އަދަދަކަށް ވެލާގެ އެފެއްދުންތައް ލިބެން ހުންނަ ގައުމުތަކެވެ.
