ކަންނެލި އެކްސްޕޯޓުކޮށްގެން ވިއެޓްނާމަށް މިއަހަރުގެ ފުރަތަމަ އަށް މަސް ދުވަސްތެރޭ 730 މިލިއަން ޑޮލަރުގެ އާމްދަނީއެއް ލިބިއްޖެއެވެ. މިއީ މިދިޔަ އަހަރުގެ މި މުއްދަތާއި އަޅާ ބަލާއިރު 55 ޕަސެންޓް އިތުރު އަދަދެކެވެ.
ވިއެޓްނާމްގެ ޖެނެރަލް ޑިޕާޓުމަންޓު އޮފް ވިއެޓްނާމް ކަސްޓަމްސްގެ ތަފާސްހިސާބުތައް ދައްކާގޮތުން މިދިޔަ މަހު އެކަނިވެސް އެޤައުމުންވަނީ 92 މިލިއަން ރުފިޔާގެ ކަންނެލި އެކްސްޕޯޓު ކޮށްފައެވެ. މިއީ 86 ޕަސެންޓް އިތުރު އަދަދެއްކަން ފާހަގަކޮށްލެވެއެވެ.
ވިއެޓްނާމުން އެންމެ ގިނަ އަދަދަކަށް ކަންނެލި ބޭރުކުރަނީ އެމެރިކާ، ކެނެޑާ، ޖަޕާން، ސައުދި އަރަބިއްޔާ، ތައިލޭންޑު އަދި އީޔޫގެ ބައެއް ޤައުމުތަކަށެވެ. ތަފާސްހިސާބުތައް ދައްކާގޮތުން މި ޤައުމުތަކަށް އެކްސްޕޯޓުކުރި ކަންނެލީގެ އަދަދުތައްވަނީ މިއަހަރުތެރޭ ވަރަށް ބޮޑަށް އިތުރުވެފައެވެ.
ވިއެޓްނާމްގެ ކަސްޓަމްސްއިން ހާމަކުރާގޮތުގައި މިއަހަރުތެރޭ އެޤައުމުން 97 ޤައުމަކަށްވަނީ ކަންނެލި އެކްސްޕޯޓުކޮށްފައެވެ. އަދި އެޤައުމުން އެކްސްޕޯޓުކުރާ ސީފުޑުގެ 10 ޕަސެންޓް ހިއްސާކުރަނީ ކަންނެލި މަހެވެ.
ވިއެޓްނާމްގެ އެސޯސިއޭޝަން އޮފް ސީފުޑް އެކްސްޕޯޓާސް އެންޑު ޕްރޮޑިއުސާސް އިން ލަފާކުރާގޮތުގައި މިއަހަރުގެ ބާކީ އޮތް ހަތަރުމަސް ތެރޭވެސް އެޤައުމުން ކަންނެލި އެކްސްޕޯޓުކުރާ މިންވަރު އިތުރުވާނެއެވެ.
ވިއެޓްނާމުން ކަންނެލި ބޭރުގެ ބާޒާރުތަކުގައި ވިއްކަމުންދަނީ ވަރަށް އަގުހެޔޮކޮށެވެ. އެހެންކަމުން ދުނިޔޭގެ ބާޒާރުގައި ތަކެތި އަގުތައް އުފުލެމުންދާ މި ދަނޑިވަޅުގައި ވިއެޓްނާމުގެ މަހުގެ އުފެއްދުންތަކަށް އޮންނަ ޑިމާންޑުވަނީ ބޮޑުވެފައެވެ.
ވިއެޓްނާމުން ލަފާކުރާގޮތުގައި މިއަހަރު ނިމޭއިރު، އެޤައުމުގެ ކަންނެލި އެކްސްޕޯޓުން ލިބޭ އާމްދަނީގެ އަދަދު 1.1 ބިލިއަން ޑޮލަރަށް އަރާނެއެވެ. މި އަދަދު ވެގެންދާނީ މިދިޔަ އަހަރާއި އަޅާ ބަލާއިރު 45 ޕަސެންޓް އިތުރު އަދަދަކަށެވެ.
