ގދ. ތިނަދޫއަށް ނިސްބަތްވާ ދޯންޏެއްގެ އިންޖީނު އަޅަން ދޯނި ރަހުނުކޮށް ލޯނެއް ނަގައި، އެ ލޯނު ނުދެއްކުމުން ބޭންކް އޮފް މޯލްޑިވްސް (ބީއެމްއެލް) އިން ދޯނި ވިއްކާލަން އަނެއްކާވެސް އިއުލާނުކޮށްފިއެވެ.
މި ދޯނި ވިއްކާލަން މިދިޔަ މަހުގެ ކުރީކޮޅުވެސް ބީއެމްއެލް އިން ވަނީ އިއުލާނު ކޮށްފައެވެ.
"އޭޝިއާ" ދޯނީގެ ދިގުމިނަކީ 37.797 މީޓަރެވެ. ދޯނީގެ ފުޅާމިނުގައި 9.630 މީޓަރު ހުރި އިރު، ފުންމިނުގައި ހުރީ 3.990 މީޓަރެވެ. އަދި ޓަނޭޖަކީ 73.430 އެވެ.
ދޯންޏާ ބެހޭގޮތުން، ދޯނީގެ ވެރިފަރާތުގެ އެއްބަނޑު އެއްބަފާ ކޮއްކޮ އިސްމާއީލް އާދަމް މި ނޫހަށް ބުނީ، އެ ދޯނި ބަނުމަށްފަހު، އިންޖީނު އެޅުމަށްޓަކައި، ދޯނި ރަހުނުކޮށް ބޭންކުން ލޯނެއް ނެގި ކަމަށެވެ. އަދި އެ ލޯނު ނުދެއްކުމުގެ ސަބަބުން ބޭންކުން ދޯނި ނީލަމުގައި ވިއްކާލަނީ ކަމަށެވެ.
"އެމީހުން (ބޭންކުން) އެކިފަހަރު މަތިން ފައިސާ ދައްކަން އަންގާފަ، ކޯޓުގެ ހުރިހާ މަރުހަލާތައް ކަޑައްތުކޮށްފަ، ނީލަން މިހާރު ދެތިން ފަހަރު ކިޔައިފި، ދެން ނަގާނެ ބަޔަކު ނުވެގެންހެން ހީވަނީ، އަނެއްކާވެސް ނީލަމުގަ މިހާރު އޮތީ،" މިދިޔަ މަހުގެ ކުރީކޮޅު މި ނޫހާ ވާހަކަ ދައްކަމުން އިސްމާއީލް ބުނެފައިވެެއެވެ.
މި ދޯނި ވިިއްކާލުމަށް މިހާރު ދެތިންފަހަރު ބޭންކުން ނީލަމަށް ލީ ނަމަވެސް، މިހާތަނަށް އަދި ދޯނި ވިކިފައި ނުވާކަމަށް އިސްމާއީލް ބުންޏެވެ.
ބޭންކުން ކޮށްފައިވާ އިއުލާނަށް އިޝާރާތް ކުރަމުން އިސްމާއީލް ބުންޏެވެ.
