މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރގެ ފަރާތުން ގްރޭޑް 10 ގައި މެރިން ސައިންސް ކިޔަވައި ދެމުންދާ ކ. އަތޮޅުގެ ނުވަ ސްކޫލަކަށް އަމާޒުކޮށްގެން ކުރިއަށް ގެންދާ މެރިން ސައިންސް ކޭމްޕް މިއަދު ފަށައިފިއެވެ.
ކޮވިޑް 19 ގެ އާލަމީ ބަލިމަޑުކަމާ ގުޅިގެން މެރިން ސައިންސް ކޭމްޕް ނުބާއްވާ މެދުކެނޑިފައިވެއެވެ.
މި ހަފްތާގެ ނިޔަލަށް ދެމިގެންދާ މި ކޭމްޕްގައި މި އަހަރު މެރިން ސައިންސް ކިޔަވަމުންދާ 185 ދަރިވަރުން ބައިވެރިވާނެއެވެ. މި ކޭމްޕްގެ މަޤްޞަދަކީ މެރިން ސައިންސް ދާއިރާއިން ތައުލީމު ހާސިލް ކުރަމުންދާ ދަރިވަރުންނަށް އެ ދާއިރާއިން ހިއްވަރުދީ، ޝައުގުވެރިކަން އުފެއްދުމުގެ އިތުރުން މި ދާއިރާއިން ބައެއް އަމަލީ މަސައްކަތްތައް ދަސްކޮށްދިނުން ކަމަށް މިނިސްޓްރީން މައުލޫމާތުދެއެވެ.
އެގޮތުން މިނިސްޓްރީގެ ޓީމުން ފިޝަރީޒް މެނޭޖްމެންޓް އަދި މެރިކަލްޗަރ ދާއިރާއާ ގުޅޭ މަޢުލޫމާތު ދިނުމުގެ އިތުރުން ކ. ހުރާގެ ކުޅިއަށް ޒިޔާރަތްކޮށް ޕްލޭންކްޓަން ކަލެކްޓް ކޮށް އޮބްޒަރވް ކުރުމުގެ އިތުރުން މެރިން ސައިސް ދާއިރާގެ އަމަލީ މަސައްކަތްތައް ކުރިއަށް ގެންދާނެއެވެ. މީގެ އިތުރުން، އެމްއެންޑީއެފް ކޯސްޓް ގާރޑާ ގުޅިގެން ކަނޑުމަތީގެ ރައްކާތެރިކަމާ ގުޅޭގޮތުން މަޢުލޫމާތު ދިނުމުގެ އިތުރުން، ކަނޑުމަތީގެ ރައްކާތެރިކަމާ ބެހޭ އަމަލީ ސެޝަންތައްވެސް ކުރިއަށް ގެންދާނެއެވެ.
މި މެރިން ސައިންސް ކޭމްޕް ހުޅުއްވައި ދެއްވަމުން މިނިސްޓަރ ދެއްކެވި ވާހަކަފުޅުގައި، ދިވެހިރާއްޖޭގެ މޫސުމަށް އަންނަ ބަދަލުތަކުގެ ސަބަބުން ރާއްޖޭގެ ގުދުރަތީ މާޙައުލަށް އަންނަމުންދާ ބަދަލުތައް ފާހަގަކޮށް، މި ބަދަލުތަކައް ރާއްޖެ އެޑެޕްޓް ކުރުމުގެ މަސައްކަތައް މެރިން ސައިންސް ދާއިރާގެ މުހިންމުކަން ވަނީ ފާހަގަ ކުރައްވާފައެވެ.
މީގެ އިތުރުން، މިނިސްޓަރ ވަނީ މެރިން ސައިންސް ދާއިރާއިން ތައުލީމު އުނގެނުމުގެ މުހިންމުކަން ފާހަގަކޮށް، މި ކޭމްޕްގައި ބައިވެރިވި ހުރިހާ ދަރިވަރުންނަށް މި ދާއިރާއިން ތައުލީމު ޙާސިލްކުރުމަށް ހިތްވަރުދެއްވާފައެވެ.
