ވިއެޓްނާމުން އާސިއާންގެ ޤައުމުތަކަށް ބޭރުކުރާ މަހުގެ އަދަދު އިތުރުވަމުންދާ ކަމަށް ތަފާސްހިސާބުތަކުން ދައްކައިފިއެވެ. އެގޮތުން މިއަހަރުގެ ފުރަތަމަ 9 މަސް ދުވަހުގެތެރޭ 152 މިލިއަން ޑޮލަރުގެ މަސް ވިއެޓްނާމުން އާސިއާންގެ ޤައުމުތަކަށް އެކްސްޕޯޓުކޮށްފައިވާއިރު، މިއީ %8 އިތުރު އަދަދެކެވެ.
ވިއެޓްނާމުގެ އެސޯސިއޭޝަން އޮފް ސީފުޑް އެކްސްޕޯޓާސް އެންޑު ޕްރޮޑިއުސާސްއިން ލަފާކުރާގޮތުގައި އެޤައުމުން މިހާރު އެންމެ ގިނަ އިން މަސް އެކްސްޕޯޓުކުރާ މާކެޓުކަމުގައިވާ ޔޫރަޕިއަން ޔޫނިއަންގެ ޤައުމުތައް ފަހަތަށް ޖައްސާލުމަށްފަހު އާސިއާން މާރކެޓު ކުރިއަރާނެއެވެ.
އާސިއާންގެ ޤައުމުތަކުގެތެރެއިން އެންމެ ގިނަ އަދަދަކަށް ވިއެޓްނާމުން މަސް އެކްސްޕޯޓުކުރަނީ، ފިލިޕީންސް، ތައިލޭންޑު އަދި ސިންގަޕޫރަށެވެ. މީގެތެރެއިން ފިލިޕީންސްއަށް އެކްސްޕޯޓުކުރާ މަހުގެ އަދަދުވަނީ ވަރަށް ބޮޑަށް އިތުރުވެފައެވެ. އެގޮތުން އަހަރުގެ ފުރަތަމަ 9މަސްދުވަހުގެތެރޭ ފިލިޕީންސްއަށް 25 މިލިއަން ޑޮލަރުގެ މަސް ވަނީ އެކްސްޕޯޓުކޮށްފައެވެ.
އާސިއާންގެ އެހެން ޤައުމުތައް ކަމުގައިވާ ކެމްބޯޑިއާ، އިންޑޮނޭޝިއާ، ލާއޯސްއަށްވެސް ވިއެޓްނާމުން އެކްސްޕޯޓުކުރާމަހުގެ މިންވަރު ވަނީ އިތުރުވެފައެވެ. އެެހެންނަމަވެސް ދަތުރުފަތުރުކުރުމުގެ އަގުތައް އުފުލުން ފަދަ ކަންތައްތަކާއި ގުޅިގެން މަސް އެކްސްޕޯޓުކުރުމުގެ މަސައްކަތައްް ގޮންޖެހުންތައް ކުރިމަތިވާކަމަށް ވިއެޓްނާމުގެ އެސޯސިއޭޝަން އޮފް ސީފުޑް އެކްސްޕޯޓާސް އެންޑު ޕްރޮޑިއުސާސްއިން ހާމަކުރެއެވެ.