ތ. ގުރައިދޫ ބަނދަރު ސަރަހައްދުގައި މަސްކެނޑުމަށް ޙާއްސަ ތަނެއް ތަރައްޤީކުރުމަށް ޝައުގުވެރިވާ ފަރާތްތަކަށް އެ ފުރުސަތު އަލުން ހުޅުވާލައިފިއެވެ.
ގުރައިދޫ ކައުންސިލްގެ އިދާރާއިންކޮށްފައިވާ އިއުލާނެއްގައި ބުނެފައިވަނީ އެރަށު ބަނދަރު ސަރަޙައްދުގެ ހުޅަނގު ފަރާތުގައި މަސްކެނޑުމަށް ތަނެއް ހެދުމަށް ބޭނުންވާތީ 08 ސެޕްޓެމްބަރު 2022 ވަނަ ދުވަހު ކުރި އިޢުލާނަށް އެއްވެސް ފަރާތަކުން ޝަރުޠު ހަމަވާވަރަށް އަންދާސީ ހިސާބު ހުށަހަޅާފައި ނުވާ ކަމަށެވެ. އެެހެންކަމުން އަލުން ބީލަން ހުށަހެޅުމުގެ ފުރުޞަތު ޢާއްމުކޮށް ހުޅުވާލީ ކަމަށެވެ.
ބީލަން ހުޅުވާލެވިފައިވަނީ، ވިޔަފާރި ރަޖިސްޓްރީ ކުރުމުގެ ޤާނޫނުގެ ދަށުން ވިޔަފާރި ރަޖިސްޓްރީ ކޮށްފައިވާ ފަރާތްތަކަށާއި، އަމިއްލަ ފަރުދުންގެ ވިޔަފާރީގެ ޤާނޫނުގެ ދަށުން ރަޖިސްޓްރީ ވެފައިވާ ފަރާތްތަކަށެވެ.
މި ބީލަމުގައި ބައިވެރިވާން އެދޭ ފަރާތްތަކުން އަންނަ މަހުގެ 2ވަނަ ދުވަހުގެ 14:00ގެ ކުރިން ގުރައިދޫ ކައުންސިލުގައި ރެޖިސްޓްރީ ކުރަން ޖެހެއެވެ.
ބީލަންވެރިންނަށް މަޢުލުމާތު ދިނުން އޮންނާނީ އަންނަ މަހުގެ 6ވަނަ ދުވަހުގެ 10:00ގައި ގުރައިދޫ ކައުންސިލް އިދާރާގެ މީޓިންގ ރޫމްގައެވެ. މަޢުލޫމާތު ދިނުމުގެ ސެޝަނުގައި ބީލަމާއި ގުޅިގެން ސަމާލުކަން ދޭންވީ ކަންކަން ހިއްސާ ކުރުމާއި ބީލަންވެރިންގެ ސުވާލުތަކަށް ޖަވާބު ދިނުން އޮންނާނެކަމަށް ގުރައިދޫ ކައުންސިލުން ހާމަކުރެއެވެ. އަދި މަޢުލޫމާތު ސެޝަންގައި ބައިވެރިވެ ވަޑައިނުވެވުނަސް ބިޑް ރަޖިސްޓްރީ ކޮށްފައިވާނަމަ ބީލަމުގައި ބައިވެރި ވެވޭނެކަމަށްވެސް އެރަށު ކައުންސިލުން ހާމަކުރެއެވެ.
