އިންޑިއާގެ ޕަންޖާބުގައި މަސް އާލާކުރުމުގެ މަސައްކަތް އަދިވެސް ކުރަމުންދަނީ އެންމެ އިހުގައި މީހުން މި މަސައްކަތް ކުރުމުން އައި ގޮތަށެވެ.
އެގޮތުން، ބޮޑު ފެންގަނޑަކަށް 1000 ކުދި މަސް ދޫކޮށްލަނީއެވެ. އާއްމުގޮތެއްގައި މިކަހަލަ ފެންގަނޑެއްގެ ބޮޑު މިނަކީ 272 އަކަ މީޓަރެވެ. އެހެން ނަމަވެސް ޒަމާނީ އާލަތްތައް ކަމުގައިވާ މަސް އާލާ ކުރާ ކޮށިތަކުގައި މަސްތައް ބޮޑު ކުރުމުން ކުޑަ ޖާގައެއްގައި އެކަންތައްކޮށްލެވެއެވެ.
އިހުގައި މަސް އާލާކުރި ގޮތަށް މަސް އާލާކުރުމުގެ މަސައްކަތް ކުރުމުން، އޭކަރެއްގެ ފެންގަނޑަކުން ލިބެނީ 1480 ކިލޯގެ މަހެވެ. އެހެންނަމަވެސް ޒަމާނީ ގޮތަށް ކޮށީގައި މި މަސައްކަތްކުރުމުން ލިބޭ މަސްތަކުގެ އަދަދު އެތައް ގުނައެއް އިތުރެވެ.
ކަމުގެ ތަޖުރިބާކާރުން ދެކޭގޮތުގައި މަސްވެރިން އަދިވެސް ޒަމާނީ ވަސީލަތްތަކަށް އަހުލުވެރިވެފައި ނުވަނީ ސަރުކާރުން އެކަމަށް އަހައްމިޔަތުކަމެއް ނުދޭތީއެވެ. އަދި މިކަމަށް ބޭނުން ތަމްރީންތައްވެސް ދެވިފައި ނުވާތީއެވެ.
ޒަމާނީ ވަސީލަތްތަކުގެ ބަދަލުގައި އިހުގައި މި މަސައްކަތް ކުރަމުން ދިޔަގޮތަށް މަސައްކަތް ކުރަމުން ދިޔުމުން މަސް އާލާކުރުމުގެ ވިޔަފާރިން ލިބޭ އާމްދަނީވެސް ކުޑައެވެ. މިއާއެކު ގިނަ ބަޔަކު ދަނީ މި ދާއިރާ އާއި ދުރަށް ޖެހެމުންނެވެ.
