މާންދޫ ފިޝަރީޒްއަށް މަސް ކިރުމަށްފަހު، ފައިސާ ނުލިބި ގިނަދުވަސްތަކެއްވެ، މަސްވެރިން މުޒާހަރާ ކުރާތާ، މިއަދަށް ދެ ދުވަސް ވީއިރު ފިޝަރީޒް މިނިސްޓްރީން އެކަމުގައި އަޅާނުލާ ކަމަށް މަސްވެރިން ބުނަން ފަށައިފިއެވެ.
މަސްވެރިން މުޒާހަރާ ފަށާފައި ވަނީ އިއްޔެ ހެނދުނު 8:30 ގައި ލ. މާންދޫ ބަނދަރުގައެވެ.
ކަންބޮޑުވުންތަކާއެކު މެދުރާއްޖެތެރޭގެ މަސްވެރިން މާދަމާ މުޒާހަރާއަށް ނުކުންނަނީ
މުޒާހަރާގެ ބައިވެރިއަކު މިއަދު މި ނޫހަށް ބުނީ، އިއްޔެއަށްވުރެ މިއަދުގެ މުޒާހަރާ މާ "ހޫނު" ކަމަށެވެ. އަދި މިއަދު މުޒާހަރާގައި ބައިވެރިވަމުންދާ ދޯނިފަހަރުވެސް އިތުރުވަމުންދާ ކަމަށެވެ.
މުޒާހަރާގެ ބައިވެރިން ބުނަމުން ދަނީ، 'ހައްގު ނުލިބޭނަމަ' މުޒާހަރާ ނުހުއްޓާނެ ކަމަށެވެ.
މީގެ އިތުރުން މަސްވެރިން ބުނި ގޮތުގައި، އެކި ދޯނިތަކަށް ލިބެންޖެހޭ 21 މިލިއަން ރުފިޔާ ނުލިބި ވާކަމަށް އިއްޔެ ބެލި ބެލުމުން އެނގިފައިވާ ކަމަށެވެ. އެހެންކަމުން މަސްވެރިން ޑިމާންޑު ކުރަނީ އެ ފައިސާ ދިނުމަށާއި، ކޮންމެ ބިލަކަށް ފައިސާ ދިނުމަށެވެ.
"އަޅުގަނޑުމެން އެބައޮތް އެތައް ބައިވަރު ތަނަކަށް ޑީސަލަށް، އައިހަށް ދަރާފަ. ކްރެޑިޓްވެފަ އެބައޮތް، އެ މީސްމީހުން އަތުން ޑީސަލް ނަގައިގެން. މިއަދަކު ނެތް އަޅުގަނޑުމެންނަށް ޑީސަލް ދޭނެ ބަޔަކު. މަހަށް ފުރޭނެ ގޮތެއް ނެތް. އެހެންވީމަ މި ހާލަތަށް އައީމަ އަޅުގަނޑުމެން ސުލްހަވެރިކަމާއެކު މުޒާހަރާއެއް ފެށީ، މުޒާހަރާ ފެށީމަ މިތަނުން މިއޮތީ ކޮންމެ ގޮތެއްވިޔަސް، އަޅުގަނޑުމެން މިތާ ރީއްޗަށް ތިއްބާ [ފުލުހުން]ޕޭޕަ ސްޕްރޭ ޖަހާ، އަނެއްހެން ބުނަންޏާ ގަޔަށް ބޮލަށް އަރާ، މި ހާލަތަށް ގޮސްގެން މީތި މިހާރު ހޫނުވެފަ މިއޮތީ،" މުޒާހަރާގައި ބައިވެރިވި މަސްވެރިއަކު ބުންޏެވެ.
މުޒާހަރާ ހޫނުވެ، މިއަދު ވަނީ ފުލުހުންނާއި މަސްވެރިންގެ މެދުގައި ހަމަނުޖެހުންވެސް ހިނގާފައެވެ. އެގޮތުން މުޒާހަރާގައި ބައިވެރިވި މަސްވެރިއެއް ކަމަށްވާ އާދަމް ފާރިޝް މި ނޫހަށް ބުނީ، ފުލުހުން ޕެޕަސްޕްރޭ ޖެހުމުން، ދެ މަސްވެރިއަކަށް އަނިޔާވި ކަމަށާއި، އެކަމާ ހިތްހަމަ ނުޖެހި، މަސްވެރިން ވެއްޔާއި ގަލާ އުކީ ކަމަށެވެ. އަދި އެކަމުގެ ސަބަބުން ފުލުހަކަށް އަނިޔާ ލިބުނީ ކަމަށެވެ.
މަސްވެރިންގެ މުޒާހަރާ މިއަދު މާ "ހޫނު"، ޑިމާންޑަކީ ލިބެންޖެހޭ 21 މިލިއަން ރުފިޔާ
މީގެ އިތުރުން، މުޒާހަރާ ވަރުގަދަކޮށް، މިއަދު ވަނީ މަސްވެރިންގެ އަނބިދަރިންވެސް މުޒާހަރާގައި ބައިވެރި ވެފައެވެ.
ނަމަވެސް މިކަމާ ގުޅިގެން ފިޝަރީޒް މިނިސްޓްރީން އެއްވެސް ފިޔަވަޅެއް އަޅާފައި ނުވާކަމަށާއި މިހާތަނަށް މިކަމުގައި އެއްވެސް ބަހެއްވެސް ބުނެފައި ނުވާކަމަށް މަސްވެރިން ބުނެއެވެ.
