ގދ.ފަރެސްމާތޮޑާއިން ފުރައިގެން، އައްޑޫއަށް ދަތުރު ކުރަމުންދިޔަ ލޭންޑިން ކްރާފްޓްއެއް ބަންޑުންޖަހާލައި، އެކަކު މީހާ އަދިވެސް ނުފެންނަ ކަމަށް އެމްއެންޑީއެފްއިން ބުނެފިއެވެ.
ގެއްލުނު މީހާ ހޯދުމަށް ވައިގެ މަގުންނާއި ކަނޑުމަގުން މިއަދުގެ އިރުއޮއްސުމާ ހަމައަށް 900 ސްކެއަރ ނޯޓިކަލް މޭލު ސަރަހައްދެއް ބަލާފައި ވާކަމަށް އެމްއެންޑީއެފްއިން މައުލޫމާތުދެއެވެ. މި މީހާ ހޯދުމުގެ މަސައްކަތް މާދަމާ ވެސް އެމްއެންޑީއެފް ސަދަން އޭރިއާ ކޮމާންޑުން ކުރިއަށް ގެންދިއުމަށް ވަނީ ހަމަޖެހިފައެވެ.
މި ހާދިސާގެ މަޢުލޫމާތު އެމްއެންޑީއެފް ކޯސްޓްގާޑު މެރިޓައިމް ރެސްކިޔު ކޯޑިނޭޝަން ސެންޓަރަށް ލިބިފައިވަނީ އިއްޔެ މެންދުރު 12:50 ހާއިރު ކަމަށް އެމްއެންޑީއެފްއިން މައުލޫމާތުދެއެވެ.
ދިޔަވެ ބަންޑުން ޖަހާލި ލޭންޑިންގކްރާފްޓުގައި ތިބި ފަޅުވެރިންގެ ތެރެއިން ތިން މީހުން ފުރަތަމަ ނަގާފައިވަނީ އެ ސަރަހައްދުން ދަތުރުކުރަމުންދިޔަ "ސީ ވީޑް" ނަމަކަށް ކިޔާ ދޯންޏަކަށެވެ. އެމްއެންޑީއެފް ސަދަން އޭރިއާ ކޯސްޓްގާޑް ފޯތު ސްކޮޑްރަންގެ ހާބަރ ކްރާފްޓުގައި މި ތިން ފަޅުވެރިން، އިއްޔެ ހަވީރު 4:10 ހާއިރު ވަނީ ގދ.ވާދޫއަށް ގެންގޮސްފައެވެ.
ހަތަރު ވަނަ ފަޅުވެރިޔާ ހޯދުމުގެ މަސައްކަތް އެމްއެންޑީއެފް ސަދަން އޭރިއާ ކޯސްޓްގާޑް ފޯތު ސްކޮޑްރަންގެ ފާސްޓް އިންޓަރސެޕްޓަރ ކްރާފްޓް "މާފަތް" އަންނަނީ ކުރަމުންނެވެ.
