މިއަހަަރުގެ މަސްވެރިންގެ ދުވަސް ރަސްމީކޮށް ފާހަގަކުރުމަށް ހަމަޖެހިފައިވާ ރަށް ކަމުގައިވާ ގދ. ފަރެސްމާތޮޑާގައި މަސް ކެނޑުމުގެ މުބާރާތެއް ބޭއްވުމަށް ނިންމައިފިއެވެ.
ފަރެސްމާތޮޑާ ކައުންސިލުން ބުނީ، މިއީ މަސްވެރިންގެ ދުވަހުގެ މުނާސަބަތުގައި ބާއްވާ ހަރަކާތެއް ކަމަށެވެ. އެރަށު ކައުންސިލުން މިހާރުވަނީ މި މުބާރާތުގައި ބައިވެރިވާން ބޭނުންވާ ފަރާތްތަކަށް އެ ފުރުސަަތު ހުޅުވާލާފައެވެ. އެގޮތުން މިމަހުގެ 21ވަނަ ދުވަހުގެ މެންދުރުފަހު 13:00ގެ ކުރިން ފަރެސްމާތޮޑާ ކައުންސިލް އިދާރާއަށް ވަޑައިގެން މަޢުލޫމާތު ސާފު ކުރުމަށްވަނީ އެދިފައެވެ. އަދި މިމަހުގެ 24ވަނަ ދުވަހުގެ މެންދުރުފަހު 14:00ގެ ކުރިން ފަރެސްމާތޮޑާ ކައުންސިލް އިދާރާއަށް ފޯމު ހުށަހަޅަން ޖެހެއެވެ.
ކޮންމެ އަހަރެއްގެވެސް ޑިސެމްބަރު 10 ވަނަ ދުވަހު ފާހަގަ ކުރާ މަސްވެރިންގެ ދުވަހުގެ ރަސްމީ ޖަލްސާ މިއަހަރު ބާއްވަން ހަމަޖެހިފައި ވަނީ ފަރެސްމާތޮޑާގައެވެ. އެހެންކަމުން އެ ދުވަހަށް ތައްޔާރު ވުމަށްޓަކައި އެރަށުން ވަނީ ގިނަ މަސައްކަތްތަކެއް ފަށާފައެވެ.އެގޮތުން ރަށް ސާފުކުރުމުގެ މަސައްކަތްވެސް ބާރަށް ކުރިއަށްއެބަދެއެވެ.
