ރާއްޖޭގެ އިޤްތިޞާދީ ކަނޑުގެ ސަރަހައްދުގައި މަސްވެރިކަން ކުރަމުންދިޔަ ބޭރުގެ މަސް ބޯޓެއް ކޯސްޓްގާޑުގެ ބެލުމުގެ ދަށަށް ގެންގޮސްފައި ވާކަމަށް އެމްއެންޑީއެފްއިން ބުނެފިއެވެ.
ކ.ދިއްފުށީގެ އިރުން 35 ނޯޓިކަލް މޭލު ބޭރުން، ރާއްޖެއިން ބޭރުގެ މަސްބޯޓެއް ހަރަކާތްތެރިވަމުން ދާކަމުގެ މަޢުލޫމާތު އެމްއެންޑީއެފް ކޯސްޓްގާޑަށް ފޯރުކޮށްދިނީ "އަސަރީ" ނަމަކަށް ކިޔާ ދޯންޏަކުން ކަމަށް އެމްއެންޑީއެފްއިން މައުލޫމާތުދިނެވެ.
"އެ މަޢުލޫމާތު ލިބުމާއެކު، އެމްއެންޑީއެފް މާލޭ އޭރިއާ ކޯސްޓްގާޑު ސެކްނަޑް ސްކޮޑްރަންގެ "އެފްއައިސީ ހަކުރާ" މި ސަރަޙައްދަށް ގޮސް، އެ މަސްބޯޓު ހޯދުމަށްފަހު، އެމްއެންޑީއެފް ކޯސްޓްގާޑުގެ ބެލުމުގެ ދަށަށް މިއަދުގެ 17:25 ހާއިރު ވަނީ ގެނެވިފައި،" އެމްއެންޑީއެފްއިން މައުލޫމާތުދިނެވެ.
މިހާރު ކޯސްޓްގާޑުގެ ބެލުމުގެ ދަށުން މި މަސްބޯޓު މާލެ ގެނައުމަށް އަންނަނީ މަސައްކަތް ކުރަމުންނެވެ.
ދިވެހި މަސްވެރީންގެ ފަރާތުން އެމްއެންޑީއެފް ކޯސްޓްގާޑަށް ދެއްވާ އެހީތެރިކަމާއި އެއްބާރުލުން އެމްއެންޑީއެފްއިން ވަނީ ފާހަގަ ކޮށްފައެވެ. އަދި މިއަދު ފެނުނު ބޭރުގެ މަސްބޯޓު، ކަމާބެހޭ އިދާރާގެ ބެލުމުގެ ދަށަށް ގެންދިއުމަށް އެހީތެރިވެދިނީތީ "އަސަރީ" ދޯނީގެ ކެޕްޓަނާއި ފަޅުވެރީންނަށް އެމްއެންޑީއެފްއިން ވަނީ ޝުކުރު އަދާކޮށްފައެވެ.
