ގަވާއިދާ ހިލާފަށް ރާއްޖޭގެ ކަނޑުގެ ސަރަހައްދުގައި މަސްވެރިކަން ކުރަނިކޮށް ހިފެހެއްޓީ ލަންކާ މަސްބޯޓެއް ކަމަށް ފުލުހުން ބުނެފިއެވެ.
ރާއްޖޭގެ އިޤްތިޞާދީ ކަނޑުގެ ސަރަހައްދުގައި މަސްވެރިކަން ކުރަމުންދިޔަ ބޭރުގެ މި މަސް ބޯޓު، ކޯސްޓްގާޑުގެ ބެލުމުގެ ދަށަށް ގެންގޮސްފައި ވަނީ ރޭގެ ވަގުތެއްގައެވެ.
މި ބޯޓުގައި ތިބީ ފަސް މީހުންނެވެ.
އެމްއެންޑީއެފްއިން ބުނީ، ކ.ދިއްފުށީގެ އިރުން 35 ނޯޓިކަލް މޭލު ބޭރުން، ރާއްޖެއިން ބޭރުގެ މަސްބޯޓެއް ހަރަކާތްތެރިވަމުން ދާކަމުގެ މަޢުލޫމާތު އެމްއެންޑީއެފް ކޯސްޓްގާޑަށް ފޯރުކޮށްދިނީ "އަސަރީ" ނަމަކަށް ކިޔާ ދޯންޏަކުން ކަމަށެވެ.
"އެ މަޢުލޫމާތު ލިބުމާއެކު، އެމްއެންޑީއެފް މާލޭ އޭރިއާ ކޯސްޓްގާޑު ސެކްނަޑް ސްކޮޑްރަންގެ "އެފްއައިސީ ހަކުރާ" މި ސަރަޙައްދަށް ގޮސް، އެ މަސްބޯޓު ހޯދުމަށްފަހު، އެމްއެންޑީއެފް ކޯސްޓްގާޑުގެ ބެލުމުގެ ދަށަށް މިއަދުގެ 17:25 ހާއިރު ވަނީ ގެނެވިފައި،" އެމްއެންޑީއެފްއިން މައުލޫމާތުދިނެވެ.
އެމްއެމްޑީއެފްިން އެ ބޯޓު މިހާރު ވަނީ ފުލުހުންނާ ހަވާލު ކޮށްފައެވެ.
މިކަމާ ގުޅިގެން، ކަމާ ގުޅޭ އިދާރާތަކާއެކު، ބަލަންޖެހޭ ކަންކަން ބަލަމުންދާ ކަމަށް ފުލުހުން މައުލޫމާތު ދިނެވެ.
ރާއްޖޭގެ އިޤްތިޞާދީ ކަނޑުގެ ސަރަހައްދުން މަސްވެރިކަން ކުރަނިކޮށް އެންމެ ގިނައިން އަތުލައިގަންނަނީ ސްރީލަންކާ މަސްބޯޓިފަހަރެވެ.
