ގދ. ނަޑެއްލާގެ ބޭރުގައި އަޅާފައިވާ ކަނދުފަތި ކަނޑައިގެން ދިޔަކަމަށް އެއްވެސް ކައުންސިލަކުން ނާންގާ ކަމަށް ފިޝަރީޒް މިނިސްޓްރީން ބުނެފިއެވެ.
މިނިސްޓްރީން މިހެން ބުނެފައި ވަނީ، ހުރިހާ ކަނދުފައްޗެއް އަލުން ގާއިމުކޮށް ނިމިފައި ވާކަމަށް މިނިސްޓްރީގެ ސައިޓުގައި އޮތް ނަމަވެސް، ނަޑެއްލާ ކަނދުފަތި އޮތީ ކެނޑިފައި ކަމަށް އެ އަތޮޅުގެ މަސްވެރިން ބުނުމާ ގުޅިގެންނެވެ.
ފިޝަރީޒް މިނިސްޓްރީގެ ކޮމިއުނިކޭޝަން ޑިރެކްޓަރ ނަސްރުﷲ ހުސައިން މި ނޫހަށް ވިދާޅުވީ، ކަނދުފައްޗެއް ކަނޑައިގެން ދިޔަކަން މިނިސްޓްރީއަށް އެނގޭނީ، އެކަމުގެ ރިޕޯޓު ލިބުމުން ކަމަށެވެ.
"އަޅުގަނޑުމެން ކަނދުފައްޗެއް ކަނޑައިގެން ދިޔަކަމަށް ނިންމަނީ، އަޅުގަނޑުމެންނަށް އެ ރިޕޯޓެއް ލިބުނީމަ. މާނައަކީ އެ ސަރަހައްދެއްގެ ކޮންމެވެސް ކައުންސިލަކުން، ކަނދުފަތި ކަނޑައިގެން ދިޔަކަމަށް ރިޕޯޓު ހުށައެޅީމަ ނޫނީ ކޮމްޕްލެއިން ކުރީމަ،" ނަސްރު ވިދާޅުވިއެވެ.
ނަޑެއްލާ ކަނދުފަތި ކަނޑައިގެން ގޮސްފައިވާކަމުގެ އެއްވެސް ރިޕޯޓެއް ލިބިފައި ނުވާކަމަށް ނަސްރު ވިދާޅުވިއެވެ.
މި ނޫހާ ވާހަކަ ދެއްކި ގދ. އަތޮޅުގެ ބައެއް މަސްވެރިން ބުނިގޮތުގައި، ނަޑެއްލާ ކަނދުފަތި ކަނޑައިގެން ގޮސްފައިވާތާ ދެތިން މަސް ވެދާނެއެވެ.
"ލިސްޓުގަ އިނީ އޯގަސްޓް 30 ވަނަ ދުވަހު ކަނދުފަތި އެޅި ކަމަށް. އެފަހުން އެ ކަނދުފަތި ކަނޑައިގެން ގޮސްފަ ވަނީ،" މަސްވެރިއަކު ބުންޏެވެ.
އޭނާ ބުނި ގޮތުގައި، އެ ކަނދުފަތި ކަނޑައިގެން ގޮސްފައިވާތާ ފަސް ވަރަކަށް މަސް ވެއްޖެއެވެ.
މިކަމާ ގުޅިގެން ގދ. ގެ އެހެން މަސްވެރިއަކުވެސް، އެ ކަނދުފަތި ކަނޑައިގެން ގޮސްފައިވާ ކަމަށް މައުލޫމާތުދިނެވެ.
