މާދަމާއިން ފެށިގެން، ހުޅުމާލޭ މަސްވެރިންގެ ބަނދަރުން މިފްކޯ ރޭޓުގައި ޑީސަލް ގަންނަން ލިބޭނެ ކަމަށް ފިއުލް ސަޕްލައިސް މޯލްޑިވްސް (އެފްއެސްއެމް) އިން ބުނެފިއެވެ.
އެންސިސް ފިޝަރީޒްގެ ދަށުން ހިންގަމުން ދިޔަ، ހުޅުމާލޭ މަސްވެރިންގެ ބަނދަރުގައި ގާއިމުކޮށްފައިވާ ތެޔޮ މަރުކަޒާ އެފްއެސްއެމްއިން ހަވާލުވީ މިއަދުއެވެ. މި އެއްބަސްވުމުގައި އެންސިސްގެ ފަރާތުން ސޮއިކުރެއްވީ އެ ކުންފުނީގެ ޗެނާމަން މުހައްމަދު ވަސީމްއެވެ. އަދި އެފްއެސްއެމްގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގް ޑިރެކްޓަރ މުހައްމަދު ޤަސަމްއެވެ.
މާދަމާ އިން ފެށިގެން ހުޅުމާލޭ މަސްވެރިންގެ ޖެޓީ އިން މަސްވެރިންނަށް ޙާއްސަ ރޭއްޓެއްގައި ތެޔޮ ލިބޭނެ މިކަމުގެ ސަބަބުން މާލޭ ސަރަޙައްދުން މަސްވެރިންގަންނަ ތެލުގެ އަގުހެޔޮވެގެންދާނެ. pic.twitter.com/sjCJIRwpOe
— Mohamed Gasam (@MGasam) November 27, 2022
ތެޔޮ މަރުކަޒާ އެފްއެސްއެމްއިން ހަވާލުވުމާ ގުޅިގެން އެފްއެސްއެމްގެ ސޭލްސް އެޗްއޯޑީ އަހުމަދު ރިފްޢަތް މި ނޫހަށް ވިދާޅުވީ، މާދަމާ ހެނދުނުން ފެށިގެން، މިފްކޯ ރޭޓުގައި މަސްވެރިންނަށް ޑީސަލް ގަންނަން ލިބޭނެ ކަމަށެވެ.
"ކުރިން އެތަނުން [ޑީސަލ] ލިބެމުން ދިޔަ އަގަށްވުރެ ހެޔޮވާނެ މިހާރު. ދެން އެތަނުން އަބަދުވެސް ތެޔޮ ލިބޭނެ ކަމުގެ ޔަގީންކަން އޮންނާނެ މަސްވެރިންނަށް،" ރިފްޢަތް ވިދާޅުވިއެވެ.
ހެނދުނު 8:00 އިން ރޭގަނޑު 11:00ގެ ނިޔަލަށް، މި ތެޔޮ މަރުކަޒުން ޚިދުމަތް ލިބޭނެއެވެ.
މިފްކޯއިން މަސްވެރިންނަށް ޑީސަލް ވިއްކަނީ، ލީޓަރެއް 17.63 ރުފިޔާގެ ރޭޓުންނެވެ. ނަމަވެސް ސަބްސިޓީއާއެކު ޑީސަލް ލީޓަރެއް 16.97އަށް ލިބެއެވެ. މީގެކުރިން މިފްކޯއިން މި އަގުގައި ޑީސަލް ވިއްކަމުން ދިޔައީ ގއ. ކޫއްޑޫގައާއި އައްޑޫގައި ގާއިމު ކޮށްފައިވާ ފެކްޓްރީގެ އިތުރުން އެ ކުންފުނީގެ ބޯޓުފަހަރަށެވެ.
ހުޅުމާލޭ މަސްވެރިންގެ ބަނދަރުން، އަގުހެޔޮޮކޮށް ޑީސަލް ގަންނަން ލިބުމަކީ މަސްވެރިން ކުރަމުންއައި ވަރަށް ދުވަސްވީ އުންމީދެކެވެ.
