އެމްއެންޑީއެފް ސެންޓްރަލް އޭރިއާ ކޮމާންޑާއި ލ.މާމެންދޫ ކައުންސިލް ގުޅިގެން، ލ.މާމެންދޫ މަސްވެރިންނަށް އަމާޒުކޮށްގެން ފަސްޓް އެއިޑްއާއި ފަޔަރ އެވެއަރނަސް ޕްރޮގްރާމެއް ފަށައިފިއެވެ.
އިއްޔެއާއި މިއަދު މާމެންދޫގައި ކުރިއަށްގެންދިޔަ މި ޕްރޮގްރާމުގައި، އެ ރަށުގެ 8 ފަރާތަކުން ބައިވެރިވެފައި ވެއެވެ.
މި ޕްރޮގްރާމުގައި، ސީޕީއާރް ދޭނެ ގޮތާއި، ލިބޭ އަނިޔާތަކުގައި ބެންޑޭޖު ކުރަންޖެހޭ ގޮތާއި، ސްޓްރެޗަރ ބޭނުންކުރާނެ ގޮތުގެ އިތުރުން، އަލިފާނުގެ ހާދިސާއެއް ހިނގައިފިނަމަ ނިއްވުމަށް ބޭނުންކުރާ އަލިފާން ނިވިއާއި ބްލޭންކެޓް ބޭނުންކުރާނޭ ގޮތް ކިޔައިދީ، ޢަމަލީގޮތުން ބައިވެރިންނަށް އެކަން ވަނީ ފަރިތަކޮށްދީފައެވެ.
މާމެންދޫ ކައުންސިލްގެ ފުރިހަމަ އެއްބާރުލުން ލިބެމުންދާ މި ޕްރޮގްރާމްގައި، މުދައްރިބުންގެ ގޮތުގައި ހަރަކާތްތެރިވީ އެމްއެންޑީއެފް ސެންޓްރަލް އޭރިއާ ކޮމާންޑްގެ ސިފައިންނެވެ.
