އެއް ދުވަހުން އެންމެ ގިނަ މަސް ބޭނި ރިކޯޑު ބާޚިރާ ދޯންޏަށް!

ދިވެހި ރާއްޖޭގައި، ދޮށީގެ މަސްވެރިކަމުގައި އެއް ދުވަހުން އެންމެ ގިނަ މަސް ބޭނި ދޯނީގެ ރިކޯޑު، ގދ. ފަރެސްމާތޮޑާ "ބާޚިރާ" ދޯނިން ގާއިމު ކޮށްފިއެވެ.

އެއް ދުވަހުން އެންމެ ގިނަ މަސް ބޭނި ރެކޯޑު މީގެ ކުރިން ގާއިމު ކޮށްފައި ވަނީ ގދ. މަޑަވެލީ "ޓީއެސް" ލައިން ދޯނިންނެވެ. އެ ދޯނިން ވަނީ 57 ޓަނު މަސް ކޫއްޑުއަށް ކިރުވާފައެވެ.

އޭގެ ކުރިން، އެ ރިކޯޑު އޮތީ ގދ. ތިނަދޫ "ރަސްމަގު" ދޯނީގައެވެ. އެ ދޯނިން ވަނީ 2006 ވަނަ އަހަރު، އެއް ދުވަހުން 53 ޓަނު މަސް ބާނާފައެވެ.

#NEWRECORD! Congratulations to Bakhira, operating from GDh. Fares-Maathoda for breaking the record for highest catch weighed in a single day using sustainable Pole & Line fishing. Bakhira broke this record with 58.6 metric tons! pic.twitter.com/Eg8JoolfiV

— MIFCO (@mifcomv) December 3, 2022

ގދ. ފަރެސްމާތޮޑާގައި ދުއްވާ "ބާޚިރާ" އަކީ އެންމެ ޒަމާނީ ވަސީލަތްތަކާއެކު މަސްވެރިކަން ކުރާ ދޯނިތަކުގެ ތެރޭގައި ހިމެނޭ ދޯންޏެކެވެ.

117 ފޫޓުގެ ދިގު މި ދޯންޏަކީ ރާއްޖޭގެ އެންމެ ބޮޑެތި މަސްދޯނި ތަކުގެ ތެރޭގައި ގުނާލެވޭ ދޯންޏެކެވެ. ދޯނީގެ އިންޖީނަކީ 1050 ހޯސްޕަވަރުގެ ބޮޑު އިންޖީނެކެވެ. މިއީ ރާއްޖޭގެ މަސްދޯނިފަރުގައި ބޭނުންކުރާ އެންމެ ބޮޑެތި އިންޖީނު ތަކުގެ ތެރޭގައި ހިމެނޭ އިންޖީނެކެވެ. މި ދޯނީގެ ދުވެލި އުޅެނީ ގަޑިއަކު 13 ނޯޓިކަލް މޭލުގައެވެ.

މި ދޯނީގައި 37 މަސްވެރިން ހަރަކާތްތެރި ވެއެވެ. ދޯނީގެ ދެކެޔޮޅުންނަކީ ގދ. ފަރެސްމާތޮޑާ، އެވިލާ، ހަސަން ޒަރީރާއި، ފަރެސްމާތޮޑާ ފެންފިޔާޒުގޭ މުޙައްމަދު ރަޝީދެވެ.

މި ދޯނީގެ ވެރިޔަކީ ރާއްޖޭގެ މަޝްހޫރު ވިޔަފާރިވެރިއެކެވެ.