ވިއެޓްނާމުން އެކްސްޕޯޓުކުރާ ސީފުޑުގެ ބާވަތްތަކުން ލިބޭ އާމްދަނީ އަހަރު ނިމޭއިރު 11 ބިލިއަން އެމެރިކާ ޑޮލަރަށް އަރާނެ ކަމަށް ލަފާކޮށްފިއެވެ.
ވިއެޓްނާމް އެސޯސިއޭޝަން އޮފް ސީފުޑު އެކްސްޕޯޓާރސް އެންޑު ޕްރޮޑިއުސަރސްއިން ހާމަކުރާ ގޮތުގައި، ޑިނގާ އެކްސްޕޯޓުކޮށްގެން އަހަރުގެ މިހާތަނަށް 4.3 ބިލިއަން ޑޮލަރު ލިބިފައިވާއިރު، މިއަދަދަކީ މިދިޔަ އަހަރުގެ މި މުއްދަތާ އަޅާ ބަލާއިރު 30 އިންސައްތަ އިތުރު އަދަދެކެވެ.
ވިއެޓްނާމުން އެކްސްޕޯޓުކުރާ ކަންނެލީގެ އަދަދުވެސް ވަނީ ފުރަތަމަ ފަހަރަށް އެއް ބިލިއަން ޑޮލަރަށް ވުރެ އިތުރުވެފައެވެ. އެސޯސިއޭޝަނުން މައުލޫމާތު ދޭ ގޮތުގައި ކޮވިޑާ ގުޅިގެން ސީފުޑު އެކްސްޕޯޓަށް ކުރި އަސަރުތަކުން މިހާރު އެއްކޮށް އަރައިގަނެވިފައިވާ ކަމަށެވެ.
ވިއެޓްނާމުން އެންމެ ގިނަ އަދަދަކަށް ސީ ފުޑް އެކްސްޕޯޓު ކުރަނީ އީޔޫގެ ޤައުމުތަކަށާއި، އެމެރިކާ، ޗައިނާ އަދި ޖަޕާނަށެވެ. އެގޮތުން އެޤައުމުން އެކްސްޕޯޓުކުރާ ސީ ފުޑްގެ 74 އިންސައްތަ އެކްސްޕޯޓުކޮށްފައިވަނީ މި ޤައުމުތަކަށެވެ.
ވިއެޓްނާމުގެ ސީފުޑުގެ ސިނާއަތް މިހާރަށްވުރެ ބޮޑަށް ކުރިއެރުވުމަށްޓަކައި އުފެއްދުންތަކުގެ ކޮލިޓީ އިތުރުކޮށް، އޮޕަރޭޝަންތައް ހަރުދަނާކުރުން މުޙިއްމު ކަމަށް ވިއެޓްނާމް އެސޯސިއޭޝަން އޮފް ސީފުޑު އެކްސްޕޯޓާރސް އެންޑު ޕްރޮޑިއުސަރސްއިން ހާމަކުރެއެވެ.
