އެމެރިކާގެ ފްލޮރިޑާގެ ބީޗެއްގައި މަރުތޭލެއް ބޭނުންކޮށްގެން މީހަކު މިޔަރެއްް މަރާ ވީޑިއޯއެއް އާއްމުވެއްޖެއެވެ. އޭނާ މިޔަރު މެރުމަށްޓަކައި ގިނަ އިރުތަކެއްވަންދެން އޭގެ ގައިގައި މަރުތޭލަކުން ތަޅައެވެ.
މި ވީޑިއޯ ނަގާފައިވަނީ ބީޗާއި ކައިރީގައި ހުރި ހޮޓަލެއްގައި ހުރި މީހެކެވެ. އަދި ވީޑިއޯ އެންމެ ފުރަތަމަ ޕޯސްޓުކޮށްފައިވަނީ ފޮކްސް 35 ނިއުސް އިންނެވެ.
ވީޑިއޯއިން ފެންނަ ގޮތުގައި މިޔަރުގެ ގައިގައި މަރުތޭލުން ތަޅާއިރު، އެތަނުގައި އިތުރު މީހަކު ބަލަހައްޓައިގެން ހުރެއެވެ.
ވީޑިއޯ ފެންނަ މިޔަރަކީ ހިމާޔަތްކޮށްފައިވާ ބާވަތެއްކަމުގައިވާ ލެމަން ޝާކެކެވެ. މި ވީޑިއޯ އާއި ގުޅިގެން މިކަމާއި ގުޅޭ ތަހުޤީގުތައް ފްލޮރިޑާގެ ފިޝް އެންޑު ވައިލްޑްލައިފް ކޮންސަވޭޝަން ކޮމިޝަނުންވަނީ ފަށާފައެވެ.
ތަފާސްހިސާބުތައް ދައްކާގޮތުން އަހަރެއްގެ ތެރޭ 100 މިލިއަނަށްވުރެ ގިނަ މިޔަރު އިންސާނުންގެ އަމަލުތަކުން މަރުވެއެވެ. އާއްމުގޮތެއްގައި މިޔަރު މަރަނީ އޭގެ އުރަހައިގެ ބޭނުމުގައެވެ. އެންމެ ގިނައިން މި ބޭނުމަށް މިޔަރު މަރަނީ ޗައިނާ އަދި ވިއެޓްނާމުގައެވެ. އެޤައުމުތަކުގައި މިޔަރު އުރަހައިން ތައްޔާރުކުރާ ސޫޕަކީ މަޤްބޫލް އެއްޗެކެއެވެ.
