ވިލާތުގެ ގައުމުތަކުން ދިވެހި ކަނޑުމަހަށް ނަގާ ޑިއުޓީ ވަރަށް އަހަވަށް ކުޑަ ކުރެވޭނެ ކަމަށް ސަރުކާރުން ބުނެފިއެވެ.
ރައީސް އޮފީހުގައި ނޫސްވެރިންނާ ބައްދަލުކުރައްވައި، ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވީ، ވިލާތުގެ ގައުމުތަކުން ދިވެހި މަހަށް ނަގަމުންދާ ޑިއުޓީ ކުޑަ ކުރުމަށް ސަރުކާރުން ގިނަ މަސައްކަތްތަކެއް ކޮށްފައިވާ ކަމަށާއި އަދި ވަރަށް ގިނަ މަސައްކަތްތައް ކުރަމުން އަންނަ ކަމަށެވެ.
މިއުވާން މިހެން ވިދާޅުވީ، އިނގިރޭސިވިލާތުން މަހުގެ ޑިއުޓީ ކުޑަ ކުރަން އުޅޭކަމަށް މަޖިލީހުގެ ރައީސް، ރައީސް ނަޝީދު ވިދާޅުވެފައިވުމާ ގުޅިގެން، ނޫސްވެރިއަކު ކުރި ސުވާލަކަށް ޖަވާބު ދެއްވަމުންނެވެ.
"މީގެ ކުރިން ވިލާތުގެ އިއްތިހާދާ އަދި އިނގިރޭސިވިލާތާ އެއްކޮށް ކުރެވުނު ވަރަށް ގިނަ ބައްދަލުވުންތަކުގަވެސް ރާއްޖެއިން ޔޫރަޕަށް އަދި އިނގިރޭސިވިލާތަށް ބޭރުކުރާ މަހުން އެ ގައުމުތަކުން ނަގަމުންދާ ޑިއުޓީ ކުޑަ ކުރުމާ ގުޅޭގޮތުން މަޝްވަރާ ކުރެވޭ ވާހަކަ އަޅުގަނޑުމެން ނޫސްވެރިންނާ ހިއްސާކުރަން،" މިއުވާން ވިދާޅުވިއެވެ.
މީގެ އިތުރުން މިއުވާން ވިދާޅުވީ، އެކަމުގައި ދިވެހި ސަރުކާރުން އިސްނަގައިގެން ވަރަށް ގިނަ މަސައްކަތްތަކެއް ކުރެއްވި ކަމަށާއި ރައީސްގެ ހާރިޖީ ސިޔާސަތުގެ ތެރެއިން ގައުމުތަކާއެކު އޮންނަ ގުޅުން ބަދަހިވެ، މި މަސައްކަތަށްވެސް ބޮޑެތި ކުރިއެރުންތަކެއް ލިބިފައިވާ ކަމަށެވެ.
ސަރުކާރުން ދާދި ފަހުން ގދ. ފަރެސްމާތޮޑާގައި ބޭއްވި ޖަލްސާގައި، ސަރުކާރުން ފޮރިން މިނިސްޓްރީއާއި އިކޮނޮމިކް މިނިސްޓްރީ އަދި ފިޝަރީޒް މިނިސްޓްރީއާ މިފްކޯއާއި ފިނޭންސް މިނިސްޓަރާ އެކުއެކީގައި، މަހުގެ ޑިއުޓީ ކުޑަ ކުރުމާ ގުޅޭގޮތުން ބޭރުގެ އެކިއެކި ފަރާތްތަކާ މަޝްވަރާކުރައްވަމުން ގެންދަވާކަމަށްރައީސް ޞާލިޙު ވިދާޅުވެފައި ވާކަމަށް މިއުވާން ވިދާޅުވިއެވެ.
"އިރާދަކުރެއްވިއްޔާ ދުރު ނޫން މުސްތަގުބަލެއްގަ އެކަމަށް ހައްލެއް ގެނެވި، ރާއްޖެއިން ޔޫރަޕަށާ އިނގިރޭސި ވިލާތަށް ބޭރުކުރާ މަހަށް މިއަށްވުރެ އަގު ލިބިގެންދާނެ ކަމަށް، އަދި އޭރުން އަޅުގަނޑުމެންނަށް މަސްވެރިންނަށް ބޮޑު އަގު ދެވޭނެކަމަށް ރައީސުލް ޖުމްހޫރިއްޔާ ވަނީ ވިދާޅުވެފަ. އަދި ކައިރި މުސްތަގުބަލެއްގަ އެކަން ވާނެ ކަމަށް، މަޝްވަރާތަކުގެ އަލީގަ ވަނީ ވިދާޅުވެފަ" މިއުވާން ވިދާޅުވިއެވެ.
އެކަމުގައި އިނގިރޭސިވިލާތާއެކު ފާއިތުވި ހަތަރު އަހަރު ގިނަ މަސައްކަތްތަކެއް ކޮށްފައި ވާނެކަމަށްވެސް މިއުވާން ފާހަގަ ކުރެއްވިއެވެ.
