މިދިޔަ އަހަރު ރާއްޖެއިން މަސް އެކްސްޕޯޓް ކުރި މިންވަރު ފަސް ޕަސަންޓު ދަށް ކަމަށް ހިސާބުތަކުން ދައްކައިފި އެވެ.
މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ނެރުނު ތަފާސްހިސާބުތަކުން ދައްކާގޮތުގައި، 2021 ވަނަ އަހަރު، ނޮވެމްބަރު މަހުގެ ނިޔަލަށް ރާއްޖެއިން އެކްސްޕޯޓްކުރީ 69،000 މެޓްރިކް ޓަނުގެ މަހެވެ. ނަމަވެސް މިދިޔަ އަހަރުގެ އެ މުއްދަތުގައި ރާއްޖެއިން އެކްސްޕޯޓް ކޮށްފައިވަނީ 65،000 މެޓްރިކް ޓަނުގެ މަހެވެ.
ކަޅުބިލަ މަހުގެ އެކްސްޕޯޓް އިތުރުވި ނަމަވެސް ޖުމްލަ މަހުގެ އެކްސްޕޯޓް ދަށްވީ ކަންނެލީގެ އެކްސްޕޯޓް ދަށްވުމުންނެވެ.
މަހުގެ އެކްސްޕޯޓަށް ބަލާއިރު، ތާޒާ އަދި ގަނޑުކުރި މަހުގެ ބާވަތްތަކުގެ ތެރެއިން މިދިޔަ އަހަރު އެންމެ ގިނައިން އެކްސްޕޯޓު ކުރީ ކަޅުބިލަ މަހާއި ރީނދޫ އުރަހަ ކަންނެއްޔެވެ.
މިިދިޔަ އަހަރު ކަޅުބިލަ މަހުގެ 46،000 މެޓްރިކް ޓަން އެކްސްޕޯޓު ކޮށްފައި ވާއިރު 2021 ވަނަ އަހަރު އެކްސްޕޯޓު ކޮށްފައި ވަނީ 45،000 މެޓްރިކް ޓަނެވެ.
މިިދިޔަ އަހަރު ރީނދޫ އުރަހަ ކަންނެލީގެ 8،000 މެޓްރިކް ޓަނު އެކްސްޕޯޓު ކޮށްފައި ވާއިރު،، 2021 ވަނަ އަހަރު ވަނީ 14،000 މެޓްރިކް ޓަނު އެކްސްޕޯޓު ކޮށްފައެވެ.
