ރާއްޖޭގެ މަސްވެރިކަން މިދުވަސްވަރު ރަނގަޅު ކަމަށާއި މަސް ކިރާވަރު އިތުރުވެއްޖެ ކަމަށް މިފްކޯއިން ބުނެފިއެވެ.
މިފްކޯގެ ސީއީއޯ އިސްމާއިލް ފައުޒީ ވިދާޅުވީ، އެވްރެޖްކޮށް ދުވާލެއްގެ މައްޗަށް މިފްކޯއަށް 300 ޓަނުގެ މަސް ކިރަމުން އަންނަކަމަށެވެ. ރާއްޖޭގެ ހުރިހާ ހިސާބަކަށްވެސް މި ދުވަސްވަރު މަސްވެރިކަން ރަނގަޅުކަމަށް ފައުޒީ ވިދާޅުވިއެވެ.
"މަސްވެރިކަން މީމު އަތޮޅާއި ހުވަދޫއާއި އަދި ދެކުނުގެ މަސްވެރިކަންވެސް ރަނގަޅު. އުތުރަށްވެސް އެވްރެޖްކޮށް ރަނގަޅު" ފައުޒީ ވިދާޅުވިއެވެ.
އެއްވެސް ލިމިޓެއް ނެތި، މަސްވެރިން ބާނާ ހުރިހާ މަހެއް މިފްކޯއިން ގަންނަމުންދާކަން ފާހަގަ ކުރައްވައި ފައުޒީ ވިދާޅުވީ، މަސް ކިރާ ބޯޓުފަހަރު ދުރު ހިސާބުތަކަށް ފޮނުވަން ދަތިތައް ކުރިމަތިވާ ކަމަށެވެ.
އެގޮތުން ބޯޓުތައް ހުސްކޮށް އަނބުރާ ދިއުމަށް ވަގުތުކޮޅެއް ނަގާކަމަށާއި ނަމަވެސް އަންލޯޑްކުރުމަށްފަހު ބޯޓުތައް އަވަހަށް ފޮނުވުމުގެ މަސައްކަތް މިފްކޯއިން ކުރަމުންދާކަމަށް އޭނާ ވިދާޅުވިއެވެ.
މަސްގަތުމުގެ ކެޕޭސިޓީ އިތުރުކުރުމުގެ ގޮތުން މަސް ކިރަން މިފްކޯއިން އިތުރު 3 ބޯޓުވެސް ވަނީ މިދިޔަ މަހު ގަނެފައެވެ. މިފްކޯއިން ވިދާޅުވީ، މިހާރު ކުރިއަށްދަނީ މި ބޯޓުތަކުގެ ރަޖިސްޓްރޭޝަން ބަދަލުކުރުމުގެ މަސައްކަތް ކަމަށެވެ.
