ސައުތު އެފްރިކާގައި ސީލްތައް އިންސާނުނަށް ހަމަލާދެމުންދަނީ ވިހަ މަސްތަކެއް ކެވިގެން ކަމަށް ސައިންވެރިން ހާމަކޮށްފިއެވެ.
ފާއިތުވީ ދުވަސްތަކުގައި ސީލްތައް ހަމަލާދީގެން ގިނަ އަދަދެއްގެ ފަރާތްތަކުންވަނީ ރިޕޯޓުކޮށްފައެވެ. އެގޮތުން އެމެރިކާގެ ފިލްމީ ތަރިއަކަށްވެސް ވަނީ މިފަދަ ތަޖުރިބާއެއް ކުރެވިފައެވެ.
އަދި ކުޑަ ކުއްޖަކަށްވެސް ސީލްއެއް ހަމަލާދީފައިވާއިރު، މަސްވެރިކަމަށް ނިކުމެ އުޅުނު މީހަކަށްވެސް ސީލްއެއް ހަމަލާދީ ވަނީ ގައިގެ އެކި ތަންތަނުގައި ދަތް އަޅާފައެވެ.
މިފަދަ ހާދިސާތައް ގިނަވުމާއި ގުޅިގެން ސައިންސްވެރިންވަނީ މިއީ ކީއްވެގެންވަމުންދާ ކަމެއްތޯ ބެލުމަށް ދިރާސާތައް ކުރިއަށްގެންގޮސްފައެވެ. ސީލްއަކީ އާއްމުގޮތެއްގައި އިންސާނުންނަށް ހަަމަލާދޭ އެއްޗެއް ނޫނެވެ.
ސައިންވެރިން ކުރި ދިރާސާއިން ދައްކާގޮތުގައި ސީލްތައް ހަމަލާދެމުންދަނީ ވިހަވެފައިވާ މަސް ކެއުމާއި ގުޅިގެން އޭގެ ސިކުނޑިއަށް އަންނަ ބަދަލަކާއި ގުޅިގެންނެވެ. އަދި މިއީ މަސްތައްވެސް ވިހަވެފައިވާ މޫދު ވިނަ ކެއުމުންވާ ކަމެއް ކަމަށް ސައިންސްވެރިން ހާމަކުރެއެވެ.
ސީލްތަކުގެ ހަމަލާތައް އިތުރުވުމާއި ގުޅިގެން ސައުތު އެފްރިކާގެ ކަމާއި ގުޅުންހުރި ފަރާތްތަކުންވަނީ އާއްމުން މިތަކެއްޗާއި ގާތްނުވުމަށް އިލްތިމާޒްކޮށްފައެވެ.
