ކަނޑުމަގުން ބާލީއަށް އެތެރެކުރަން މަސައްކަތްކުރި ގިނަ އަދަދެއްގެ ވެލާތަކެއް އަތުލައިގަނެފިއެވެ.
ބާލީއަށް އެތެރެކުރުމަށް މަސައްކަތްކޮށްފައިވަަނީ އިންޑޮނޭޝިއާގެ އެކި ހިސާބުތަކުން ހިފާފައިވާ ވެލާތަކެވެ. ގާތްގަނޑަކަށް 43 ވެލާ އެތެރެކުރަން މަސައްކަތް ކޮށްފައިވާއިރު، މިތަކެތި އުފުލުމަށް ބޭނުންކޮށްފައިވަނީ ކުޑަ ވަކަރު ބޯޓެކެވެ.
ވެލާތައް ހުރީ ކަންވާރު ބޭނުންކޮށްގެން ވަރަށް އިހާނެތި ގޮތަކަށް އައްސާފައެވެ.
މި ބޯޓުގައި ތިބި ދެމީހުންވަނީ ނޭވީ ބޯޓުތައްް ކައިރިވާން ފެށުމަށް ފިލާފައެވެ. އެހެންނަމަވެސް އެއީ ކޮންބައެއްކަން ދެނެގަނެވިފައިވާ ކަމަށާއި، ދާދި އަވަހަށް އެމީހުން ހައްޔަރުކުރެވިގެންދާނެ ކަމަށް ނޭވީ އިން ހާމަކުރެއެވެ.
އަދި މިކަންތައްކުރަމުންދަނީ ބޮޑު ނެޓްވޯކަކުން ކަމަށްވެސް ނޭވީއިން ތުހުމަތުކުރެއެވެ.
އަތުލައިގަނެފައިވާ 43 ވެލާގެ ތެރެއިން ނުވަ ވެލާ ފިޔަވާ އެހެން ހުރިހާ ވެލާއެއް ވަނީ އަނބުރާ ކަނޑަށް ދޫކޮށްލާފައެވެ. އަދި ހާލު އެހާ ރަނގަޅު ނުވުމުން އެ ނުވަ ވެލާވަނީ ފަރުވާއަށް މެރިން ރެސްކިއު ފެސިލިޓީއަކަށް ގެންގޮސްފައެވެ.
