ކަންނެލި އެކްސްޕޯޓުކޮށްގެން މިދިޔަ އަހަރު ވިއެޓްނާމަށް އެއް ބިލިއަން ޑޮލަރުގެ އާމްދަނީއެއް ލިބިއްޖެއެވެ. މި އަދަދަކީ 2021ވަނަ އަހަރާއި އަޅާ ބަލާއިރު %34 އިތުރު އަދަދެކެވެ.
މިއީ ވިއެޓްނާމަށް ކަންނެލި އެކްސްޕޯޓުކޮށްގެން މިހާބޮޑު އާމްދަނީއެއް ލިބުނު ފުރަތަމަ ފަހަރެވެ. މިދިޔަ އަހަރުތެރޭ ވިއެޓްނާމުން ވަނީ ކަންނެލި މަހުގެ އުފެއްދުންތައް 99 މަރކެޓަކަށް އެކްސްޕޯޓުކޮށްފައެވެ. މީގެތެރެއިން އެންމެ ގިނަ އަދަދަކަށް އެޤައުމުން ކަންނެލި އެކްސްޕޯޓުކޮށްފައިވަނީ އެމެރިކާ އަށާއި އީޔޫގެ މެމްބަރު ޤައުމުތަކަށެވެ.
މީގެއިތުރުން އިސްރާއިލް، ތައިލޭންޑު، ސައުދީ އަރަބިއްޔާ، ރަޝިއާ، ފިލިޕީންސް އަދި މިސްރަށްވަނީ ގިނަ އަދަދަކަށް ކަންނެލި ބޭރުކޮށްފައެވެ. އެގޮތުން ވިއެޓްނާމުން މިދިޔަ އަހަރުތެރޭ އެކްސްޕޯޓުކޮށްފައިވާ ކަންނެލީގެ %92 އަދި މި ޤައުމުތަކަށް އެކްސްޕޯޓުކޮށްފައިވާ ކަންނެއްޔެވެ.
އީޔޫއަށް ބަލާލާއިރު، ޖަރމަނީ، ސްޕެއިން، އަދި ބެލްޖިއަމް އަކީ އެންމެ ގިނަ އަދަދަކަށް ކަންނެލި އެކްސްޕޯޓުކޮށްފައިވާ ޤައުމުތަކެވެ. އަދި މީގެތެރެއިންވެސް ޖަރމަނީ އާއި ސްޕެއިންއަށް އެކްސްޕޯޓުކޮށްފައިވާ ކަންނެލީގެ އަދަދުވަނީ %161 އަދި %117 އަށް އިތުރުވެފައެވެ.
ދުނިޔޭގެ ބާޒާރުގައި ތަކެތީގެ އަގުތައް އުފުލެމުން ދިޔުމާއި ގުޅިގެން މިއަހަރުގެ ފުރަތަމަ ކުއާޓަރުގެތެރޭގައި ވިއެޓްނާމުން ކަންނެލި ބޭރުކުރާ މިންވަރު މިދިޔަ އަހަރުގެ މި މުއްދަތާއި އަޅާ ބަލާއިރު ދަށްވާނެ ކަމަށްވަނީ ލަފާކޮށްފައެވެ. އެހެންނަމަވެސް ޤައުމުތަކާއި އެކު ޤާއިމްކުރަމުންދާ ވިޔަފާރީގެ އެއްބަސްވުންތަކާއި އެކު މިއަހަރުގެ ފަހުކޮޅު އެކްސްޕޯޓަށް ކުރިއެރުންތައް ލިބިގެންދާނެ ކަމަށް ވަނީ ލަފާކޮށްފައެވެ.
