ލ. މާންދޫގެ ހާލަތު ހުރިގޮތުން މަސްވެރިން މަސްކިރުމަށް އުނދަގޫތަކެއް ކުރިމަތި ވަމުންދާކަމަށް މަސްވެރިން ބުނަން ފަށައިފިއެވެ.
ލ. ގަމު ފަހިމަގު ދޯނީގެ މަސްވެރިއެއް ކަމަށްވާ އާދަމް ފާރިޝް މާންދޫގައި ހުރެ ފޯނުން މި ނޫހާ ވާހަކަ ދައްކަމުން ބުނީ، މާންދޫގައި މަސްކިރަން އޮންނަ ކެރޭނު ދުވާލަކު އެއްފަހަރު ހަލާކުވާ ކަމަށެވެ. އަދި މި މައްސަލަ ތަކުރާރުކޮށް ކުރިމަތިވާތީ މަސް ކިރަން އެތައް އުނދަގޫތަކެއް ކުރިމަތިވާ ކަމަށެވެ.
މާންދޫގައި މަސްކިރަން އޮންނަނީ އެންމެ ކެރޭނެއް ކަމަށް ފާރިޝް ބުންޏެވެ.
"ކޮންމެ ދޯންޏަކަށް ދެނީ އައިސް ތައްޓެއް. އޭގެ ތައްޓެއްގައި ހުންނަނީ 600 އެއްހާ ކިލޯ" ފާރިޝް ބުންޏެވެ.
އޭގެ ސަބަބުން މަސް ކިރަން އުޅެން ޖެހެނީ ވަރަށް ހާލުގައި ކަމަށާއި ދޯނިން ނަގައިގެން ޖެޓީމައްޗަށް އަރުވައިގެން އެކަހަލަ ގޮތަމަށް ކަމަށް ފާރިޝް ބުންޏެވެ.
މީގެ އިތުރުން ފާރިޝް ބުނީ، މާންދޫއަށް ދުވާލަކު 50-40 ދޯނި މަސް ކިރަންދާ ކަމަށާއި ބައެއް ދޯނިތަކުން 10 ޓަނު ބާނައިގެން ދިޔަ ނަމަވެސް ދުވާލަކު ދޯންޏަކުން ފަސް ޓަނު މަސް ނަގާތީ، އެކަމުގައިވެސް ދަތިތަކެއް ކުރިމަތިވާ ކަމަށެވެ.
"ހަތަރު ދުވަހު މި މައްސަލަ ދިމާވޭ" ފާރިޝް ބުންޏެވެ.
މިއަދުވެސް ކެރޭނު ހަލާކުވެފައި ވާކަން ފާހަގަ ކޮށް ފާރިޝްބުނީ އިއްޔެވެސް ކެރޭނު ހަލާކުވި ކަމަށެވެ.
"އެކޮޅުން ބުނަނީ މިއަދު ކެރޭނު ހަލާކުވެފައޭ. ބުނީމަ ކޮންމެ ދުވަހަކު މިޖެހެނީ އަމިއްލައަށް ޖެޓީމައްޗަށް ފިލާ އަރުވައިގެން މަސްކޮޅު ކިރާލަން" ފާރިޝް ބުންޏެވެ.
ފާރިޝް ބުނީ ހަނދާންވާން ފެށީއްސުރެ މާންދޫގެ ހާލަތަކީ އެއީ ކަމަށެވެ. އެގޮތުން މާންދޫގައި އޮންނަނީ ބާ ޖެޓީއަކާއި އެންމެ ކެރޭނެއް ކަމަށާއި އެ ހަލާކުވެއްޖެއްޔާ މަސް ނުކިރޭ ކަމަށް ފާރިޝް ބުންޏެވެ.
