އޮސްޓްރޭލިއާގައި ވެލާތަކަށް ގޮތް ނޭގޭ ބައްޔެއް ޖެހެމުންދާތީ ޒޫ ވައިލްޑު ލައިފް ހޮސްޕިޓަލުން ކަންބޮޑުވުން ފާޅުކޮށްފިއެވެ.
އެ ހޮސްޕިޓަލުން ބުނީ އެހެން އަހަރުތަކާއި އަޅާބަލާއިރު މިދިޔަ އަހަރުތެރޭ އެތަނުން ފަރުވާ ދެވުނު ވެލާތަކުގެ އަދަދު ތިން ގުނައަށް އިތުރުވެފައިވާ ކަމަށެވެ. އެގޮތުން މިދިޔަ އަހަރުތެރޭ 300 އެއްހާ ވެލާއަށް ފަރުވާދެވިފައި ވާއިރު، އާއްމުގޮތެއްގައި މި އަދަދު އެހެން އަހަރުތަކުގައި އުޅެނީ 90ގައެވެ.
ފަރުވާދޭން ޖެހޭ ވެލާތައް އިތުރުވެފައިވުމާއި އެކު ހޮސްޕިޓަލްގައި ލިބެން ހުރި ވަސީލަތްތަކަށްވަނީ ބާރުބޮޑުވެފައެވެ.
ފަރުވާދޭ ގިނަ ވެލާތަކަކީ ގޮތް ނޭގޭ ބައްޔެއް ޖެހިފައިވާ ވެލާތަކެވެ. އެގޮތުން އޭގެ ތޮށިގަނޑުގައި ފާރުތައް ހެދިފައި ހުންނައިރު، ގައިގެ އެތެރެއަށް އޭގެ އަސަރުކޮށް، ވެލާތަކުގެ ލޭ އިންފެކްޓް ވެފައިވާކަން ވަނީ ފާހަގަ ކުރެވިފައެވެ.
މިދިޔަ އަހަރުތެރޭ ފެންނަން ފެށި މި ބައްޔަކީ އޮސްޓްރޭލިއާގައި ހިނގާ ދިޔަ ފެންބޮޑުވުމުގެ ހާދިސާތަަކަށްފަހު ފާހަގަވާން ފެށި ބައްޔެކެވެ. އެހެން ކަމުން ސައިންވެސްވެރިން ލަފާކުރަނީ މިއީ ވެލާ އާއްމުކޮށް ކައި އުޅޭ މޫދު ވިނައަށް ފެންބޮޑުވުމުގެ ސަބަބުން ކޮށްފައިވާ އަސަރަކާއިއެކު ވަމުންދާ ކަމެއް ކަމަށެވެ.
މިއީ ކީއްވެގެން ދިމާވާކަމެއްތޯ ދެނެގަތުމުގެ މަސައްކަތް ކުރެވެމުންދާއިރު، ވެލާތަކަށް މި ޖެހޭ ބައްޔަށް ފަރުވާއެއް ހޯދުމުގެ މަސައްކަތްވެސް ސިއްޙީ މާހިރުން ދަނީ ކުރަމުންނެވެ.
