ލ. މާބައިދޫ އައިސްޕްލާންޓް ގާއިމުކޮށް ހިންގަން ފެނަކަ ކޯޕަރޭޝަނާ ހަވާލު ކޮށްފިއެވެ.
މާބައިދޫގައި ގާއިމު ކުރަން ހަމަޖެހިފައި ވަނީ 25 ޓަނުގެ އައިސް ޕްލާންޓެކެވެ. އެކަމުގެ އެއްބަސްވުމުގައި ސޮއިކޮށްފައި ވަނީ މިއަދުއެވެ.
މިދިޔަ މަހުގެ ތެރޭގައި ގދ. ފިޔޯރީއާއި ގދ. މަޑަވެލީގައި އައިސްޕްލާންޓް އަޅަން ވެސް ވަނީ ހަވާލުކޮށްފިއެވެ.
މިނިސްޓްރީ އޮފް ފިޝަރީޒް މެރިންރިސޯސަސް އެންޑް އެގްރިކަލްޗަރގެ ފަރާތުން، މި ދެ ރަށުގައި އައިސްޕްލާންޓް އަޅަން ހަވާލު ކުރީވެސް ފެނަކަ ކޯޕަރޭޝަނާއެވެ.
މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް (މިފްކޯ) އިން ހިންގަމުން ދިޔަ 13 އައިސްޕްލާންޓް ވަނީ މިދިޔަ އަހަރުގެ ސެޕްޓެމްބަރު މަހުގެ ތެރޭގައި ފެނަކަ ކޯޕަރޭޝަން ލިމިޓެޑްއާ ހަވާލުކޮށްފައެވެ.
އެ ރަސްމިއްޔާތުގައި ފެނަކައިން ބުނީ، ފެނަކައިގެ އޮފީސްތައް ރާއްޖޭގެ ގިނަ ރަށްތަކެއްގައި ހުރުމުގެ ސަބަބުން އައިސްޕްލާންޓަށް ދިމާވާ މައްސަލަތައް ޙައްލުކުރުމަށް ފަސޭހަވެ މައްސަލަޖެހޭ އައިސްޕްލާންޓް ޚިދުމަތް އަލުން އިއާދަ ކުރުމަށް ނަގާ މުއްދަތު ކުޑަކުރެވިގެން ދާނެ ކަމަށެވެ.
