ރިސޯޓެއްގެ ސަޕްލާ ކުރާ ދޯންޏެއްގައި އަލިފާން ރޯވެ އަޑިއަށްގޮސްފިއެވެ.
އެމްއެންޑީއެފްއިން ބުނީ، ލ.މާވަށުގެ ދެކުނުން 7 ނޯޓިކަލް މޭލު ބޭރުން ދަތުރުކުރަމުން ދިޔަ "ނޫރު-2" ނަމަކަށްކިޔާ ދޯންޏެއްގައި އަލިފާން ރޯވެގެން، އެމްއެންޑީއެފް ސެންޓްރަލް އޭރިއާ ކޯސްޓްގާޑް ތާޑް ސްކޮޑްރަންގެ ސިފައިން ހަރަކާތްތެރި ވެފައިވާ ކަމަށެވެ.
މި ހާދިސާގެ ރިޕޯޓް އެމްއެންޑީއެފް ސެންޓްރަލް އޭރިއާ ކޯސްޓްގާޑް ތާޑް ސްކޮޑްރަންއަށް ލިބުނީ މިއަދު ހެނދުނު 07:15 ހާއިރު ކަމަށް އެމްއެންޑީއެފްއިން މައުލޫމާތުދިނެވެ.
"ހާދިސާގެ މަޢުލޫމާތު ލިބުމާ އެކު އެމްއެންޑީއެފް ސެންޓްރަލް އޭރިއާ ކޯސްޓްގާޑް ތާޑް ސްކޮޑްރަންގެ ސިފައިން އެ ސަރަހައްދަށް ދިޔައިރު ދޯނި ވަނީ އަޑިއަށް ގޮސްފަ" އެމްއެންޑީއެފްއިން ބުންޏެވެ.
ނަމަވެސް އެ ދޯނިން ދަތުރުކުރި 4 ފަޅުވެރިން (ދިވެއްސަކާއި ތިން ބިދޭސީން) ކަނޑުމަތިން (ލ.މާވަށުގެ ދެކުނުން 6 ނޯޓިކަލް މޭލު ބޭރުން ) އެމްއެންޑީއެފް ސެންޓްރަލް އޭރިއާ ކޯސްޓްގާޑް ތާޑް ސްކޮޑްރަންގެ އުޅަނދަށް ފެނިގެން އެމީހުން މިހާރު ވަނީ ލ.ގަން ރީޖަނަލް ހޮސްޕިޓަލަށް ގެންދެވިފައި ކަމަށް އެމްއެންޑީއެފްއިން ބުންޏެވެ.
ދޯނި ދަތުރުކުރަމުން ދިޔައީ ރ. އަތޮޅުން ފެށިގެން ރޮބިންސަން އައިލެންޑް ރިސޯޓަށް ކަމަށް އެމްއެންޑީއެފްއިން މައުލޫމާތުދިނެވެ.
