"ހައި ސީޒް ޓްރީޓީ" އެއްބަސްވުމުގައި ބުނީ 2030 ވަނަ އަހަރުގެ ކުރިން ކަނޑުތަކުގެ 30 ޕަސެންޓު ރައްކާތެރި ކުރާނެ ކަމަށެވެ.
"ހައި ސީޒް" އަކީ ބައިނަލްއަގްވާމީ ކަނޑުގެ ސަރަހައްދެވެ.
އެ ސަރަހައްދުގައި ހުރިހާ ގައުމުތަކަށް މަސް ބޭނުމާއި ދަތުރު ކުރުން އަދި ދިރާސާ ކުރުމުގެ ހައްގު ލިބޭނެ އެވެ.
އެ އެއްބަސްވުމާ ގުޅިގެން ފިޝަރީޒް މިނިސްޓަރު ޑރ. ހުސެން ރަޝީދު ހަސަން 'ދައުރު' ނޫހަށް ދެއްވި އިންޓަވިއުއެއްގައި ވިދާޅުވީ ރާއްޖެއިން އެންމެ ގިނައިން ބާނާ ކަޅުބިލަމަހާއި ކަންނެލި ރާއްޖެ ސަރަހައްދަށް އެތެރެވަނީ ބައިނަލްއަގުވާމީ ކަނޑުތަކުން ކަމަށެވެ.
ދުރު ރާސްތާއަށް ހިޖުރަކުރާ ކަޅުބިލަމަހަކީ ކޮންމެހެން އީއީޒެޑްގައި ހަރުލާފައި ހުންނަ އެއްޗެއް ނޫން ކަމަށާއި އެ މަސްތައް ހުރިހާ ތަންތަނަކަށް ދާކަން ފާހަގަ ކުރައްވަމުން މިނިސްޓަރު ވިދާޅުވީ އެ ސަބަބަށްޓަކާ ވެސް ހައި ސީޒްގައި ކުރާ މަސްވެރިކަމުގެ ވައްތަރުތައް ވެސް ކޮންޓްރޯލްކުރެވި، ރެގިއުލޭޓް ކުރެވޭ ގޮތެއް ވުން ބޭނުންތެރި ކަމަށެވެ.
މި އެއްބަސްވުން ރާއްޖެ ފަދަ ގައުމަކަށް ވަރަށް މުހިއްމު ކަމަށާއި 'ހައި ސީޒް ޓްރީޓީ'ގެ ދަށުން މަސްވެރިކަން ކުރުމުގެ އުސޫލުތައް ކަނޑައަޅައި ދިރުންތަކަށާއި ވެއްޓަށް ގެއްލުންވާ ވަރަށް މަސް ބޭނުން ހުއްޓުމުން ރާއްޖޭގެ އިގްތިސޯދީ ސަރަހައްދުގައި މަސްމަހާމެހި ގިނަވާނެ ކަމަށް މިނިސްޓަރު ވިދާޅުވިއެވެ.
