މުލަކަތޮޅު ވޭވަށު އަންހެނުންގެ މަސްރޭހުގެ ޗެމްޕިއަންކަން "ކަނޑު ރޯދި" ޓީމުން ހޯދައިފިއެވެ
ބައިނަލް އަޤްވާމީ އަންހެނުންގެ ދުވަސް ފާހަގަ ކުރުމުގެ ގޮތުން ވޭވަށު ކައުންސިލް އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީ ގުޅިގެން ރަށުގެ އަންހެންވެރިންގެ މެދުގައި ބޭއްވުނު މަސްރޭހުގެ ޗެމްޕިއަން ހޯދި ޓީމަށް 2000ރުފިޔާ ދީފައި ވާއިރު ރަނަރަޕް ޓީމަށްވަނީ 700 ރުފިޔާ ދީފައެވެ.
މި މުބާރާތިގައި ޗެމްޕިއަން ކަން ހޯދި ކަނޑު ރޯދި ޓީމުން 82 ކިލޯ ގެ މަސް ބާނާފައިވާއިރު ރަނަރަޕް ޓީމް "މުޑަހަނދި" ޓީމުން ވަނީ 44 ކިލޯގެ މަސް ބާނާފައެވެ.
މި އަހަރުގެ އަންހެނުންގެ ދުވަހާ ގުޅިގެން ށ. ފުނަދޫގައިވެސް މަސްރޭހެއް ވަނީ ކުރިއަށް ގެންގޮސްފައެވެ. އެ މަސްރޭހުގެ އެއްވަނަ "ކެޔޮޅު ރޮއްވި" ޓީމުން ހާސިލު ކޮށްފިއެވެ.
ކެންދޫ އަންހެނުންގެ ތަރައްގީއަށް މަސައްކަތް ކުރާ ކޮމިޓީން އިންތިޒާމު ކޮށްގެން، އަންހެނުންގެ ދުވަހާ ގުޅިގެން ވަނީ މަސްރޭހެއް ބާއްވާފައެވެ.
'ކަނބަލުންގެ މަސްރޭސް' ނަމުގައި ކުރިއަށް ގެންދިޔަ މި ހަރަކާތް ބާއްވާފައި ވަނީ އިއްޔެއެވެ.
އެ މުބާރާތުގެ އެއްވަނަ އަށްް2500 ރުފިޔާ ދިން އިރު، ދެވަނަ އަށް1500 އަދި ތިންވަނައަށް300 ރުފިޔާ ދީފައިވެއެވެ.
ޖުމްލަ 14000 ރުފިޔާގެ އިނާމާއެކު ކުޅުދުއްފުށީ އަންހެނުންނަށް މަސްރޭހެއްވެސް ބާއްވާފައިވެއެވެ.
"ކަނބަލުންގެ މަސްރޭސް2023" ގެ ނަމުގައި ބޭއްވި އެ ހަރަކާތަކީ އެރަށު އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ފަރާތުން ކުރިއަށް ގެންދިޔަ ހަރަކާތެއް ކަމަށް އެރަށު ކައުންސިލުން މައުލޫމާތުދެއެވެ.
އެ މުބާރާތުގައި އެއްވަނައަށް ދިޔަ ޓީމަށް5000 ރުފިޔާ ދިން އިރު، ދެވަނައަށް ދިޔަ ޓީމަށް3000 ރުފިޔާ އަދި ތިންވަނައަށް ދިޔަ ޓީމަކަށް2000 ރުފިޔާ ދީފައިވެއެވެ.
