މައްސަލަޖެހިގެން އުޅޭ ހިސާބަށް ރާއްޖެއިން އެއްވެސް އިރެއްގައި މަސްވެރިކަމަށްގޮސްފައިވާ ކަމުގެ އެއްވެސް ރެކޯޑެއް ނެތް ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ރާއްޖެއާއި މޮރިޝަސްގެ ކަނޑުގެ ސަރަޙަދުން ފުށުއަރާ ސަރަޙައްދުގެ އިން ވަކި ކުރުމުގެ މައްސަލާގައި، ރާއްޖެއަށް ބޮޑުބައި ލިބޭގޮތަށް، ރާއްޖެއަށް ކާމިޔާބުވުމާއިގުޅިގެން، ބޭއްވެވި ޕްރެސްކޮންފަރެންސްގައި ވާހަކަފުޅު ދައްކަވަމުންނެވެ
ރައީސް ވިދާޅުވީ މި ލިބުނު 200 ނޯޓިކަލް މޭލްއަކީ ދިވެހި މަސްވެރިންނަށް ލިބުނު ވަރަށް ބޮޑު ފައިދާއެއް ކަމަށެވެ.
"މައްސަލަ ޖެހިގެން މިއުޅޭ ހިސާބުގައި ދިވެހިންނެއް މަސްވެރިކަމެއް ނުކުރޭ، އެއްވެސް ޒަމާނެއްގައި، ކޯސްޓުގާޑުން ވިދާޅުވެފައި އެބައޮތް އެކަމެއް އެކަމެއް ނުކުރެއޭ، އެއްވެސް ރެކޯޑެއް ނެތޭ، އެހެންނަމަވެސް މިލިބުނު 200 މޭލްއަކީ ދިވެހި މަސްވެރިންނަށް ލިބުނު ވަރަށް ބޮޑު ފައިދާއެއް،" ރައީސް ވިދާޅުވިއެވެ.
މި ޕްރެސްކޮންފަރެންސްގައި ވާހަކަދައްކަވަމުން މިނިސްޓަރ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ ޑރ. ޙުސެއިން ރަޝީދު ޙަސަން ވިދާޅިވީ އެ ސަރަހައްދުގެ ކޮންޒަވޭޝަން ޒޯން ދަމަހައްޓާނެ ކަމަށް މޮރިޝަސްއިން ބުނެފައިވާ ކަމަށެވެ.
ޗާގޯސް އަދި ރާއްޖޭގެ ކަނޑުގެ ސަރަޙައްދާއި ގުޅޭގޮތުން އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް)އިން ނިންމި ނިންމުމާއި ގުޅިގެން މިނިސްޓަރ ހުސެއިން ރަޝީދު ޙަސަން ވިދާޅުވީ އދ.ގެ ޤަރާރުތަކާއި އެއްގޮތަށް ރާއްޖޭގެ ސަރަޙައްދު ކަނޑައެޅިގެން ދިޔުމަކީ ރާއްޖެއަށް ލިބިގެންދިޔަ ތާރީޚީ ކުރިއެރުމެއްކަމަށެވެ
މިނިސްޓަރ ވިދާޅުވީ، މި ނިންމުމާއި އެކު އެ ހިސާބު ބެލެހެއްޓުމުގެ މަސައްކަތް ހަރުދަނާވެގެންދާނެ ކަމަށެވެ. އަދި އެހިސާބަށް އޮތް ބާރު އިތުރަށް ބަދަހިވެގެން ގޮސްފައިވާކަންވެސް މިނިސްޓަރ ފާހަގަކުރެއްވިއެވެ.
" މިހާރު މިގޮތަށް ހަމަޖެހުނީމަ، އަޅުގަނޑުމެންގެ އިޤްތިސާދީ ސަރަހައްދަށް އެއްވެސް ބަޔަކު ވަދެ، ދާ އެޅިޔަސް އަދި އެހެން ކަމެއް ކުރިޔަސް ގާނޫން ހުއްދަ ނުކުރާ ކަމެއް ކުރަންޔާ އެކަން ހުއްޓުވޭނެ، އެގޮތުން ބަލާއިރު މަސްވެރިކަމަށް ލިބުނު ކުރިއެރުމެއް،" މިނިސްޓަރ ވިދާޅުވިއެވެ.
މިނިސްޓަރ ފާހަގަކުރެއްވިގޮތުގައި މި ނިންމުމާއި އެކު އެ ސަރަހައްދުން ލިބޭ ނަފާ އިތުރުވެގެންދާނެ ކަމަށެވެ.
ރާއްޖެއާއި މޮރީޝަސް ކަނޑުގެ ސަރަޙައްދު ފުށުއަރާ 95،563 އަކަކިލޯ މީޓަރުގެ ސަރަޙައްދުގެ ތެރެއިން އިޓްލޮސްގެ ނިންމުމާއިގުޅިގެން ރާއްޖެއަށް 47،232 އަކަކިލޯމީޓާރު ސަރަޙައްދެއް ލިބެއެވެ. މޮރީޝަސްއަށް ލިބެނީ 45،331 އަކަކިލޯމީޓަރުގެ ސަރަޙައްދެކެވެ. ޓްރައިބިއުނަލުން މިގޮތަށް ނިންމާފައިވަނީ ރާއްޖެއިން ހުށައެޅިގޮތަށެވެ.
