ޗާގޯސް ބެހިގޮތުގެ މައްސަލައާ ގުޅިގެން، މާލޭ މަސްވެރިންނަށް ހިތަށް ނުގެނެވޭވަރު ގެއްލުން ކުރިމަތިވާނެ ކަމަށް މާލޭ ސިޓީ ކައުންސިލުން ބުނެފިއެވެ.
އެ ކައުންސިލުން ނެރުނު ނޫސް ބަޔާނެއްގައި ބުނީ ރާއްޖޭގެ ޚާއްޞަ އިގްތިސާދީ ޒޯނުން 45000 އަކަކިލޯ މީޓަރަށްވުރެ ބޮޑު ސަރަހައްދެއް ގެއްލޭގޮތަށް އެ ސަރަހައްދުގެ މައްޗަށް މޮރިސަސްގެ ޞިޢާދަތީ ބާރު ހިނގާނެކަމަށް އެއްބަސްވެ ދިވެހި ސަރުކާރުން އަމަލުކުރެއްވި ގޮތް އެ ކައުންސިލުން ކުށްވެރިކުރާ ކަމަށެވެ.
އެއީ ހަމައެކަނި ދެކުނުގެ އަތޮޅުތަކުގެ މަސްވެރިންނަށް ލިބޭ ގެއްލުމެއް ނޫން ކަމަށާއި އެއީ މާލޭ ސިޓީގައި ދިރިއުޅޭ މަސްވެރިންނަށްވެސް އެކަމުގެ ސަބަބުން ހިތަށް ނުގެނެވޭހާ ގެއްލުން ކުރިމަތިވާނެ ކަމެއް ކަމަށް ސިޓީ ކައުންސިލުން ބުންޏެވެ.
އަދި ރާއްޖޭގެ މަސްކަނޑުތަކުން މަސް ހުސްވެ މަސްވެރިން ނިކަމެތި ވެދާނެ ކަމެއްކަމުގައި ދެކޭތީ، ރާއްޖޭގެ ކަނޑުގެ ސަރަހައްދުން ބައެއް ގެއްލި ދިޔަ ދިއުމަކީ އެ ކައުންސިލުން ނުހަނު ހިތާމަކުރާކަމެއް ކަމަށް އެ ކައުންސިލުން ބުންޏެވެ.
ދިވެހިރާއްޖޭގެ މަސްވެރިކަމަކީ ދުނިޔެ ބަލައިގެންފައިވާ ނަމޫނާ، ދެމެހެއްޓެނި މަސައްކަތަކަށްވާއިރު، ދިވެހިރާއްޖެއާއި އިންވެގެން ދާއަޅައިގެން ކުރާ މަސްވެރިކަމުގެ ސަބަބުން ޒަމާންވީ ދިވެހިރާއްޖޭގެ ދެމެހެއްޓެނިވި މަސްވެރިކަމަށް އެކަމުގެ ސަބަބުން ވަރަށް ބޮޑެތި އަސަރުކުރާއިރު އެކަމުގެ އަސަރު މާލޭ ސިޓީގައި މަސްވެރިކަން ކުރާ މަސްވެރިންނަށްވެސް ކުރާނެ ކަމަށް ސިޓީ ކައުންސިލުން ބުންޏެވެ.
އަދި ދިވެހިރާއްޖޭގެ ކަނޑުގެ ސަރަޙައްދުން ބައެއް ގެއްލިގެން ދިޔަ ދިއުމަކީ މަސްވެރިކަމުގެ ސިނާޢަތުގައިވާ އެންމެ ގިނަ މަސްވެރިކަމުގެ އުޅަނދުތައް ހިމެނޭ މާލޭ ސިޓީގެ އޮޑިދޯނި ފަހަރާއި ރާއްޖޭގެ އެހެނިހެން ސަރަހައްދު ތަކުގެ އޮޑިދޯނިފަހަރުގެ ވެރިންނާއި، ކެޔޮޅުންނާއި، ފަޅުވެރިންނާއި، އަދި އެހުރިހާ ފަރާތްތަކެއްގެ އާއިލާތަކަށް ކުރިމަގުގައި ބޮޑެތި ގެއްލުންތަކާއި ކުރިމަތިލާންޖެހޭނެ ކަމެއްކަމުގައި ދެކޭ ކަމަށް އެ ކައުންސިލުން ބުންޏެވެ.
އެއީ އެއްވެސް ހާލެއްގައި މިޤައުމަށް ލިބުނު ކާމިޔާބީއެއް ކަމަށް ނުދެކޭ ކަމަށާއި ގެއްލިގެންދިޔަ ކަނޑުގެ ސަރަހައްދު ހޯދުމަށާއި، ދިވެހިރާއްޖޭގެ މިނިވަންކަމާއި، ސިޔާދަތު ހިފެހެއްޓުމަށް ކެނޑިނޭޅި މަސައްކަތްކުރުމަށް ކުރަންޖެހޭ އެންމެހައި މަސައްކަތްތައް ކުރުމަށް ކަމާބެހޭ އެންމެހައި މުއައްސަސާތަކަށް ގޮވާލާ ކަމަށް މާލެ ސިޓީ ކައުންސިލުން ބުންޏެވެ.
