ބޯވައަކީވެސް ހުވަފެން ފެންނަ އެއްޗެއް ކަމާއި އެއަށް ބިރުވެރި ހުވަފެންވެސް ފެންނަކަން ދާދިފަހުން ކުރިއަށް ގެންދިޔަ ދިރާސާއަކުން ދައްކައިފިއެވެ.
އެމެރިކާގެ ރޮކްފެލާ ޔުނިވަރސިޓީގެ ސައިންވެރިންގެ ޓިމަކުން ކުރިއަށްގެންދިޔަ މި ދިރާސާގައިވަނީ ކޮސްޓެލޯ ނަމަކަށް ކިޔާ ބޯވައެއް ކޮންމެ ދުވަހަކުވެސް 24 ގަޑިވަންދެން ވީޑިއޯ ރެކޯޑުކޮށްފައެވެ.
މިގޮތަށް ރެކޯޑުކޮށްގެން ބެލި ބެލުމުގައިވަނީ އޭތި ނިދާފަ އޮވެފައި ކުއްލިއަކަށް ހޭލެވި ވަރަށްބޮޑަށް ހާސްވެގެން އުޅޭތަން ފެނެއެވެ. އެފަދަ ހާލަތްތަކުގައި އޭގެ ކުލަ ބަދަލުވެ މުޅި އެތީގެ އުޅުމަށް ބަދަލު އާދެއެވެ. ސައިންވެރިންގެ ޓީމަށްވަނީ އެފަދަ 4 ހަިދސާއެއް ރެކޯޑުކުރެވިފައެވެ.
މިއީ މިފަދަ އުޅުމެއް ރެކޯޑުކުރެވިފައިވާ ފުރަތަމަ ފަހަރެވެ. ސައިންވެރިންގެ ޓީމުން މިހާރު ވަނީ އޭގެ ވީޑިއޯވެސް އާއްމުކޮށްފައެވެ.
ވީޑިއޯއިން ފެންނަގޮތުގައި އޭތި ކުއްލިއަކަށް ހޭލެވުނު ފަހަރުތަކުގެތެރެއިން 2 ފަހަރެއްގައިވަނީ ފެންގަނޑުގެ ތެރެއަށް ކަޅު އިންކު ދޫކޮށްލާފައެވެ. މިއީ ބޯވަ އެހެން އެއްޗެހީގެ ފަރާތުން ސަލާމަތްވުމަށް ބޭނުން ކުރާ އުކުޅެކެވެ.
އެހެންކަމުން އެއަށް ނިދިން އެ ހޭލެވުނީ ވަރަށް ބިރުވެރި ހުވަފެނެއް ފެނިގެންކަމަށް ސައިންސްވެރިން ޤަބޫލުކުރެއެވެ.
ބޯވައަކީ މޫދުގައި އުޅޭ ދިރުންތަކުގެތެރެއިން އެންމެ ތޫނުފިލި އެކައްޗެވެ. މިއާއެކު އެއާ ގުޅޭ އިތުރު ހޯދުންތައް ހޯދުމަށް ސައިންވެރިންދަނީ ގިނަ މަސައްކަތްތަކެއް ކުރަމުންނެވެ.
