ކޫއްޑޫ ބަނދަރުގެ މަސައްކަތް ފެށުމަށްޓަކައި އެމްޓީސީސީއާއި މިފްކޯއިން ބައްދަލުވުމެއް ބާއްވައިފިއެވެ.
މި ބައްދަލުވުމުގައި މިފްކޯ ޓެކްނިކަލް އެންޑު ޕްރޮޖެކްޓްސްއާއި ކޫއްޑޫ ފިޝަރީޒް ކޮމްޕްލެކްސް އަދި މޯލްޑިވްސް ޓްރާންސްޕޯޓު އެންޑް ކޮންޓްރެކްޓިންގ ކޮމްޕެނީ، އެމްޓީސީސީގެ ބޭފުޅުން ބައިވެރިވެފައިވެއެވެ.
މިއީ ކޫއްޑޫ ބަނދަރު ތަރައްޤީކުރުމުގެ އަމަލީ މަސައްކަތް ފެށުމަށްޓަކައި ބޭއްވި ބައްދަލުވުމެއްކަމަށް މިފްކޯއިން ހާމަކުރެއެވެ.
MIFCO Technical & Projects and Kooddoo Fisheries Complex teams met with @MTCCPlc at Kooddoo to begin the groundwork for Kooddoo Harbour Development Project #MIFCODevelopments pic.twitter.com/O5Om6nz7Kp
— MIFCO (@mifcomv) June 1, 2023
ކޫއްޑޫގެ މިފްކޯ ބަނދަރު ބޮޑުކުރުމުގެ ޢަމަލީ މަސައްކަތް ފެށުމަށް ބޭނުންވާ ސާމާނު އެރަށަށް މިހާރު ގެންގޮސްފައިވާއިރު، މި ޕްރޮޖެކްޓްގައި ބަނދަރަށް ޖާގަ އިތުރުކުރުމާއި، މިހާރު ބޭނުންކުރާ ބަނދަރު ތަރައްޤީކުރުން ހިމެނެއެވެ.
ކޫއްޑޫގައި މިހާރު ބޭނުންކުރަމުންދާ ބަނދަރަކީ 300 ފޫޓު ކުޑަ ބަނދަރެކެވެ. މިއީ މިފަދަ ޚިދުމަތަކަށް ނިސްބަތުން ވަރަށް ކުޑަ ބަނދަރެކެވެ. މި ބަނދަރަށް އެއްފަހަރާ ކައިރިކޮށް ޚިދުމަތް ހޯދެނީ ތިންވަރަކަށް އުޅަނދަށެވެ.
އަލަށް އިތުރުކުރާ ބަޔާއެކު ބަނދަރު ގާތްގަނޑަކަށް 1500 ފޫޓުގެ ބަނދަރެއްގެ ގޮތުގައި ތަރައްޤީކުރެވޭނެއެވެ. މީގެއިތުރުން ބަނދަރު ފުންކުރުމާއި، 89,516 ކިއުބިކް މީޓަރުގެ ވެލި ގޮނޑުދޮށަށް އަޅައި ބިން ހިއްކުމާއި، 325 މީޓަރުގެ ސަރަޙައްދެއްގައި ބޭރުތޮށި ލުމާއި، 87 މީޓަރުގެ ސަރަޙައްދެއްގައި ރިވެޓްމެންޓް ޖެހުމާއި، ބަނދަރު ބައްތި ހަރުކުރުންވެސް މި މަސައްކަތުގެ ތެރޭގައި ހިމެނެއެވެ.
މީގެ އިތުރުން ސްލިޕްވޭއެއް ވެސް އެޅުމަށް ހަމަޖެހިފައިވާ ކަމަށް މިފްކޯއިން ވިދާޅުވެއެވެ. އެކުންފުނިން ވިދާޅުވީ، މި ސްލިޕްވޭގެ ސަބަބުން މިފްކޯގެ އުޅަނދުތަކުގެ މެއިންޓަނަންސް ކަންކަން ބެލެހެއްޓުމަށް ބޮޑެތި ފަސޭހަތަކެއް ލިބޭނެކަމަށެވެ.
