މިފްކޯއިން މި އަހަރުގެ މިހާތަނަށް 38،239 ޓަނުގެ މަސް ކިރުވާފައި ވާ ކަމަށާއި މިއީ މިދިޔަ އަހަރާ އަޅާ ބަލާއިރު 35 އިންސައްތަ އިތުރު އަދަދެއް ކަމަށް އެ ކުންފުނިން ބުނެފިއެވެ.
މިފްކޯގެ ފެލިވަރު ފިޝަރީޒް ކޮމްޕްލެކްސްއަށް މި އަހަރުގެ މިހާތަނަށް ކިރުވާފައި ވަނީ 4676 މެޓްރިކްޓަނުގެ މަހެވެ. މިދިޔަ އަހަރުގެ މި މުއްދަތުގައި ކިރުވާފައި ވަނީ 4028 ޓަނު މަހެވެ. އެހެންކަމުން މިއީ 16 އިންސައްތައިގެ ކުރިއެރުމެކެވެ.
ކޫއްޑޫ ފިޝަރީޒް ކޮމްޕްލެކްސްއަށް މި އަހަރުގެ މިހާތަނަށް 29،229 މެޓްރިކްޓަނުގެ މަސް ކިރުވާފައި ވާއިރު މިދިޔަ އަހަރުގެ މި މުއްދަތުގައި ކިރުވާފައި ވަނީ 21،694 ޓަނު މަހެވެ. އެހެންކަމުން މިއީ 35 އިންސައްތައިގެ ކުރިއެރުމެކެވެ.
އޭގެ އިތުރުން އައްޑޫ ފިޝަރީޒް ކޮމްޕްލެކްސްއަށް މި އަހަރު 4335 ޓަނު މަސް ކިރުވި އިރު މިދިޔަ އަހަރު ކިރުވާފައި ވަނީ 2552 ޓަނު މަހެވެ. އެއީ 70 އިންސައްތައިގެ ކުރިއެރުމެކެވެ.
މިފްކޯގެ ތިން ސައިޓަށް މަސް ކިރުވައިގެން މި އަހަރުގެ މިހާތަނަށް 636،969،593 ރުފިޔާ ދޫކޮށްފައި ވާއިރު މިދިޔަ އަހަރުގެ މި މުއްދަތުގައި ދޫކޮށްފައި ވަނީ 457،007،020 ރުފިޔާއެވެ.
